Os casos activos minguan en 55, ata situarse nos 2.703, con 593 falecementos
Do total de pasamentos, 269 foron rexistrados en residencias de maiores. As altas contabilizadas nas últimas 24 horas superaron os novos casos activos.
Por Europa Press / Redacción | SANTIAGO DE COMPOSTELA | 10/05/2020 | Actualizada ás 12:49
O número de casos activos de coronavirus baixa en Galicia ata os 2.703 este domingo, con 55 menos que o sábado, xa que as 122 altas contabilizadas superaron o número dos contaxios detectados nesta última xornada.
Desta maneira, xa son 7.347 as persoas que superaron a enfermidade, mentres que 593 perderon a vida desde o inicio da pandemia en Galicia. A última, unha muller de 87 anos que faleceu no Complexo Hospitalario Universitario de Ourense. Do total de vítimas, 269 eran maiores que vivían en residencias.
Segundo a última actualización do Sergas deste domingo, cos datos correspondentes ao sábado, a área sanitaria que preserva o maior número de casos activos segue sendo a de Vigo, con 725 pacientes (-29). Por detrás atópanse a área da Coruña, con 635 casos (-15); a de Santiago con 525 (+25); a de Ourense con 407 (-19); a de Lugo con 161 (-5); a de Pontevedra con 142 (-5) e a de Ferrol, con 108 (-7).
A única área na que se percibiu un repunte é a de Santiago. Sobre este asunto, fontes desta zona explicaron que "se trata de casos de probas realizadas a persoas asintomáticas ás que o test de dobre banda" deu resultado positivo.
Con todo, unha vez realizada a PCR esta foi negativa, pero o resultado coñeceuse con posterioridade ao envío de datos para conformar a estatística da Consellería e figuran como positivos. Por este motivo, os datos deste domingo non se axustan ao que figura á primeira hora desta mañá na área de Santiago, onde "non hai realmente incremento de casos desde onte".
UCI E ATENCIÓN HOSPITALARIA
En canto á atención sanitaria que están a recibir os pacientes que sofren a COVID-19, 25 deles atópanse en Unidades de Coidados Intensivos (UCI), un máis que onte. A gran maioría están a ser atendidos no seu domicilio, un total de 2.498, e 180 atópanse ingresados en unidades convencionais de hospitalización.
A Consellería de Sanidade tamén explicou no mesmo comunicado que ata agora o número de PCR realizadas en Galicia elévase ata 114.836 (+1.669).
RESIDENCIAS DE MAIORES
En canto ás residencias de maiores de Galicia, rexistraron este sábado novas altas médicas pola curación de nove dos seus usuarios e suman xa 704 recuperados, mentres que os casos activos baixan a 263.
Aínda que o número de persoas maiores usuarias destes centros que se recuperaron supera xa as 700, a crise da COVID-19 tamén deixa 269 falecidos relacionados con estes centros desde o inicio da pandemia -132 morreron nas propias instalacións e outros 137 en residencias integradas ou hospitais-, o que supón que o 45,36% das vítimas con coronavirus en Galicia procedían de xeriátricos.
As recuperacións foron rexistradas no centro das Fragas de Pontedeume, que suma catro altas; dous en Galisenior de Ourense, dous en Avime de Cospeito e unha en Pena da Sela no Irixo. Con todo, dos 263 anciáns que aínda teñen a COVID-19 activa, a DomusVi Barreiro, en Vigo, é agora o principal foco con 30 maiores positivos. Segue a esta a residencia Santa Teresa Jornet da Coruña, con 26 contaxiados do coronavirus.
Nos mesmos centros residenciais tamén diminuíu o número de casos activos entre os traballadores, ata os 187. Esta baixada foi posible grazas ás 16 persoas recuperadas que se rexistraron durante a xornada do sábado.
A metade de curados que recibiron o alta traballan na residencia Concepción Arenal da Coruña. Outro catro pertencen á de Vimianzo, dúas ás Fragas, un a Avime e outro á nosa Señora da Esperanza. A pesar de todo, seguen existindo centros que concentran a maior parte dos afectados: A nosa Señora da Esperanza, en Ourense (24); a Santa Teresa Jornet, na Coruña (17); o Divino Mestre (12) e a DomusVi Cangas (11).
CENTROS DE DISCAPACIDADE
Pola súa banda, nos Centros de Atención á Discapacidade (CAPD) de Galicia, de acordo co mesmo balance da Consellería de Política Social, aínda hai 72 usuarios contaxiados da COVID-19. Esta cifra é a que queda despois de que dous usuarios da residencia DomusVi Bóveda foran dados de alta ao longo do sábado.
Pola súa banda, os traballadores contaxiados dos Centros de Atención para Persoas con Discapacidade mantéñense en 34, sendo os CAPD de Redondela e A Coruña os que concentran maior número de casos.
