A Xunta xustifica ante o Goberno a petición de 8 millóns para o transporte público
Sinala que se busca paliar a caída de pasaxeiros do 97 por cento.
Por E.P. | SANTIAGO DE COMPOSTELA | 12/05/2020 | Actualizada ás 19:48
A Consellería de Infraestruturas xustificou ante o Goberno central a petición realizada de compensación de 8 millóns de euros para o transporte público polo mantemento do seu funcionamento durante o estado de alarma e ante o impacto polas restricións á mobilidade.
Así, a Xunta sinala que se busca paliar a caída de pasaxeiros do 97 por cento no transporte público interurbano en Galicia a raíz do coronavirus, que xera unha necesidade de financiamento adicional no sector.
Infraestruturas apunta que durante 2018 e 2019 as concesións de transporte público interurbano percorreron unha media de 43 millóns de quilómetros anuais. Mentres, en 2020 a cifra de quilómetros incrementouse nun 25% ata alcanzar case os 54 millóns, debido aos 98 novos contratos que comezaron a prestarse en xaneiro.
Así mesmo, o Goberno galego resalta que entre marzo e abril achegou un millón de euros en anticipos polos servizos de transporte interurbano prestado coas concesións actuais.
