Marea Galeguista preséntase ás eleccións coa intención de ser "decisiva"

A coalición decidirá a semana que vén o seu candidato á Xunta na procura do "recoñecemento de Galicia como nación".

Por Europa Press / Redacción | SANTIAGO DE COMPOSTELA | 30/05/2020 | Actualizada ás 13:10

Comparte esta noticia

A coalición de En Marea, Compromiso por Galicia e o Partido Galeguista concorrerá ás eleccións autonómicas do 12 de xullo baixo o nome de Marea Galeguista, que se presenta como "o inicio dun futuro político diferente para Galicia" e coa intención de que "sexa un factor fundamental e decisivo porque a sociedade galega o demanda".

Así se expresou este sábado o portavoz de En Marea, Pancho Casal, na presentación levada a cabo no parque de Bonaval, en Santiago de Compostela, aínda que non será ata a semana que vén cando a coalición elixa as súas listas e o seu candidato á Presidencia á Xunta.

Casal asegura que "Galicia levaba moitos anos esperando que houbese unha alternativa deste tipo", "cidadá", "galeguista" e "baseada no soberanismo", no marco dun proxecto "transversal, inclusivo e aberto".

A Marea Galeguista preséntase ás eleccións cun eixo programático de 20 puntos con prioridades como o feminismo, a ecoloxía, o galeguismo e a aposta polos servizos públicos.

Despois de que o vento tirase as bandeiras de Galicia e da Unión Europea que se atopaban detrás dos intervintes, o acto comezou coa toma da palabra da coportavoz de En Marea, María Chao, quen explica que esta plataforma ten como fin "ser o punto de partida da reconstrución do país".

"NA PROCURA DO SANTO GRAAL"

Pola súa banda, o secretario xeral de Compromiso por Galicia, Juan Carlos Piñeiro, valorou que se alcanzou este acordo para axuntar "distintas sensibilidades" nun discurso con referencias a Castelao, Rosalía de Castro e Álvaro Cunqueiro.

A continuación, Francisco López, Chesqui (Partido Galeguista), remarcou que con esta coalición se segue "un camiño na procura do santo graal" do "recoñecemento de Galicia como nación". Mentres se tenta "conseguir a unidade" de "todas as forzas de obediencia galega", quixo tamén "desexarlles o mellor" aos seus "irmáns" de Anova e BNG.

Así mesmo, Milagros Corral (CxG) resaltou a "importancia" da Unión Europea para Galicia; á vez que o presidente do Partido Galeguista, Manuel Soares, deixou claro que esta "non é unha forza de esquerdas nin de dereitas", senón que o que os agrupa "é a nación" e "a emerxencia nacional".

En Marea, Compromiso por Galicia e o Partido Galeguista negociaron na última semana esta coalición. En Marea decidiu non presentarse ás eleccións do pasado 5 de abril, pero nesta ocasión, pesaron máis as voces que quedan na formación e que apostan por concorrer cunha nova alternativa.

Compromiso por Galicia si que presentara candidaturas nas catro provincias, aínda que tamén asinara unha coalición nas pasadas eleccións (Nós Galeguistas) xunto a Vía Nova Galicia, segundo figura na xunta electoral.

Presentación de Maréaa Galeguista con Pancho Casal no centro
Presentación de Maréaa Galeguista con Pancho Casal no centro | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 8 comentarios

5 Uxio

Xúntanza de náufragos (EnMarea). Defuntos (PG). E o de CxG xa non se sabe o que é, o que debe, o destroyer que é, agora sae todo para fóra. Nin tomar un viño con estes ególatras, róubanche a carteira á primeira. O pailán este de CXG, desde que entrou a liderar non fixo máis que ir en picado o partido....a culpa non será toda del, digo eu. Algúns tiveron que facer deixación de funcións...e non lle pararon os pés. https://www.adiantegalicia.es/actua...

1 Gamela

Parece que o tal Piñeiro Docampo vén sendo un Villares Dous !

4 A torre de marfil

Os comentarios anteriores son de xente que ian derrotar a Feijoo nas urnas....que ridiculos sodes, so aspirades a ver se sacades un escano mais e seguides comodamente na oposición.

3 plan B

quen???? quen din????? ou que????? non me fagar rir!!!! non me fagan rir!!!! ------(-:))

2 Analizo

Esta xente de Marea Galeguista sabe que non vai obter representación, polo tanto presentanse máis en contra da esquerda que da dereita. O dereitoso radical de Feijóo encantado. O nacionalismo está xa concentrado no BNG. Adiante é a derrotar a dereita.

1 Galego cen por cento

Concordo totalmente, a única pega é que os poucos centos de votos que poidan rascar, seguramente sexan a conta do BNG. Unha mágoa que esta xente que só mira por ir eles a cabeza, cando realmente non van a chegar a nada. O único que van a chegar a conseguir e poder penalizar a verdadeira alternativa como é o BNG.

1 Xesús Ateo Recalcitrante

Parece que segue a haber xentes que prefiren que o Partido Popular e Núñez Feijóo siga vendendo Galiza ao mellor postor. E xúntanse nunha especie de ensalada á que pretenden chamar Marea Galega na que hai Pachivázqueces, Compromiso-non-se-sabe-con-quen, unha cousa que se chama "Unidos por el futuro" e catro máis sen futuro coa cabeza ANOVAda. En fin augúrolle grandes espazos en lugar preferente en La Voz de Galicia e no Faro de Vigo. Se é o que buscan, nos papeis van saír. E aos demócratas galegos van foder.

1 Xesus o Bo

Estas son as merdas que trae a democracia. Co fácil que sería que ti mesmo, ser de luz e prodixio da humanidade, dixeras quen se pode presentar ou mellor ainda, que dixeras directamente o gañador. Tócannos vivir tempos confusos incompatibeis coa túa sabiduría.