Óscar López tira de Marcial Dorado para cargar contra Feijóo: "Deséxolle boas vacacións; espero que non se vaia co narco"

O ministro para a Transformación Dixital e da Función Pública de España, Óscar López, respondeu con dureza ao balance que o líder do PP, Alberto Núñez Feijóo, realizou sobre o labor do Goberno estatal. Así, tras remarcar que "é o político máis sucio que houbo na historia de España", tirou de ironía para desexarlle un bo descanso estival. "Deséxolle unhas boas vacacións e só quérolle pedir unha cousa: espero que este ano non se vaia co narco", esgrimiu, en relación ás imaxes dos 90 nas que o agora líder do PP aparecía retratado con Marcial Dorado.

Nun acto celebrado en Vigo este xoves, López aproveitou para reivindicar o balance de Pedro Sánchez á fronte do Goberno central, co foco no crecemento económico, e contrapúxoo con Feijóo á fronte do PP, ao que cualificou de "estafa colectiva". "Desde que Feijóo lidera o PP o único que pasou é que Feijóo se parece a Vox. Fin", resumiu. "Feijóo chegou prometendo unha rexeneración, prometendo unha política para adultos, e tres anos despois o único polo que se lle coñece é por ser o señor que pasará á historia por abrir as portas á ultra dereita neste país", subliñou.

Nesta liña, engadiu que "cando se faga balance no futuro sobre que achegou Feijóo a España, poderase dicir moito lodo e moitos pactos coa ultradereita". Con todo, finalizou desexándolle "moitos anos máis na oposición e que teña unhas excelentes vacacións". "Iso si, insisto, que mire con quen vai este ano, a ver se pode ser que non vaia con narcos", concluíu.

O ministro para a Transformación Dixital e da Función Pública, Óscar López, en Vigo | Fonte: Adrián Irago - Arquivo