Estas son as especies invasoras que poñen en perigo os espazos protexidos de Pontevedra

Acacias, falsas acacias, canas, herbas da Pampa, cotulas, amores de home ou eucaliptos, xunto co cangrexo americano, son as principais especies vexetais e animais invasoras que ameazan os espazos protexidos da Xunqueira, o río Lérez e a Illa das Esculturas en Pontevedra.  

Este tipo de especies están converténdose en axentes de cambio e ameaza para a biodiversidade e a economía de Galicia, e especialmente para a produción agrícola, gandeira e forestal, e mesmo para a saúde pública. Por iso, e consciente da súa perigosidade e da necesidade de mantelas baixo control, o socialista Iván Puentes, edil de Desenvolvemento Sostible e Medio Natural de Pontevedra, decidiu poñer coto a esta aemaza no Concello de Pontevedra.

Para iso, destinou unha achega de 18.077,40 euros ao servizo para a eliminación de exemplares vexetais invasores en espazos naturais protexidos, que desenvolve a empresa Cormo Integral, entre outros lugares, na Illa das Esculturas, a Zona de Especial Conservación (ZEC) do río Lérez e o Espazo Natural de Interese Local (ENIL) da Xunqueira de Alba.

Iván Puentes constata que a introdución voluntaria ou involuntaria destas especies exóticas nun territorio no que non son nativas “está asociado á actividade humana e o seu impacto é considerable tanto a nivel social como económico e ambiental”. “O custo da eliminación das invasoras a nivel europeo supera os 12.500 millóns de euros ao ano. Xunto co cambio climático e a destrución de hábitats, as especies exóticas invasoras son unha das principais causas de perda de biodiversidade a nivel mundial”, apunta o edil socialista.

AS MÁIS AGRESIVAS

Entre as especies que poderían ameazar os ecosistemas de Pontevedra atópanse a acacia (acacia melanoxylon), que procede de Australia e Tasmania. Esta especie impacta negativamente sobre o crecemento da flora microbiana do solo, reduce a disponibilidade hídrica e impide o crecemento das especies vexetais autóctonas. 

Ademais está a falsa acacia (robinia pseudoacacia), oriúnda de América do Norte, que despraza e substitúe a vexetación autóctona, altera a composición forestal e invade os claros onde se conservan as escasas manifestacións do bosque caducifolio autóctono, sobre todo os ameneirais como os dos ENIL da Xunqueira de Alba e o río dos Gafos. 

De orixe asiática, a cana (arundo donax) atópase naturalizada por toda Galicia en lugares con certo grao de humidade, desprazando completamente á vexetación autóctona e alterando os regatos e medios riparios que coloniza, mentres que a herba da Pampa (cortadeira selloana) é unha planta procedente de Sudamérica con gran capacidade invasora pola súa elevada produción de sementes. A súa gran produción de pole pode provocar problemas alérxicos á poboación.

Nesta lista de colonizadoras máis agresivas inclúese a cotula (cotula coronipifolia), orixinaria da Rexión do Cabo, en Sudáfrica, que invade zonas húmidas como esteiros, xunqueiras e marismas; o amor de home (tradescantia fluminensis), de orixe sudamericana, que prolifera en hábitats naturais húmidos, sombríos e algo nitrificados, e o eucalipto (eucaliptus globulus).

CANGREXO AMERICANO

No que atinxe ao cangrexo americano (procambarus clarkii), nativo do sureste de Estados Unidos, o concelleiro Iván Puentes sinala que o espazo máis afectado é a Xunqueira de Alba, “onde os seus hábitos de alimentación poden alterar o ecosistema e desprazar a outras especies autóctonas”. “É unha praga que está en toda Galicia, que é moi preocupante, porque aniquila toda a fauna autóctona dos ríos e dos humidais, e que debemos ter controlada para que non siga proliferando”, subliña Puentes.