G.Caballero critica a Feijóo por "non facer nada" por Alcoa e pedir que o faga o Goberno central

O secretario xeral do PSdeG, Gonzalo Caballero, censurou a "ausencia" da Xunta de Galicia no conflito da planta de Alcoa en San Cibrao a pesar de ter competencias en política industrial e insistiu en que o Goberno central debe estudar todas as intervencións legais e economicamente posibles.

Así se pronunciou durante a súa participación no Foro de la Nueva Economía ao ser preguntado pola manifestación celebrada o domingo en Viveiro en defensa do emprego nesta factoría. Na súa intervención, o xefe de filas dos socialistas galegos subliñou que o mantemento do emprego é moi importante para A Mariña, para a provincia de Lugo e para o conxunto de Galicia e puxo en valor a actuación do Executivo central para garantir a viabilidade da planta fronte a unha Xunta que, na súa opinión, "non fai política industrial".

Neste sentido, lembrou que, hai dous anos cando Alcoa expuxo o peche na Coruña, o Goberno do Estado actuou para que se conseguise manter o emprego ata a actualidade e subliñou que, no caso da factoría de San Cibrao, neste período a Administración central destinou axudas por 38 millóns de euros.

"Por cada traballador 35.000 euros de apoio á empresa", precisou para esixir un "compromiso" a unha multinacional que recibiu millóns de euros públicos. Ademais, pediu traballar na aprobación do estatuto para os consumidores electrointensivos e evitar o peche das cubas en San Cibrao.

"Todas as institucións teñen que traballar para o mantemento do emprego, barallando calquera tipo de posición", insistiu o candidato socialista á Presidencia da Xunta que criticou que o Executivo de Feijóo "non fixese nada" e se limite a "estar ausente".

O secretario xeral do PSdeG, Gonzalo Caballero, en declaracións aos medios en Pontevedra. PSDEG