Abascal mete en campaña a súa avoa galegofalante: “Feijóo está tolo”
Abascal utiliza a súa avoa, natural dunha aldea da Ribeira Sacra, de orixe humilde e galegofalante, para atraer o tradicional electorado do PP.
Por Galicia Confidencial | Compostela | 13/06/2020 | Actualizada ás 22:18
Santiago Abascal, líder de Vox, sorprendeu este xoves coa publicación nas súas redes e na do seu partido dun vídeo na que sae coa súa “abueliña”. A muller, María Jesús Álvarez, de 91 anos, presume de neto e das súas orixes humildes e “fondamente galegas”.
“Bueno abueliña, que dice Feijóo que los de Vox no tenemos nada que hacer en Galicia, ni nada que ver con Galicia, que no pintamos nada allí”, comeza o vídeo no que Abasal presume de avoa e de raíces galegas. “Ese está tolo”, espeta a muller. De feito, en todo o vídeo, de 6,30 minutos, hai varias referencias ao presidente da Xunta e ningunha aos partidos da oposición de Galicia. A muller chega a dicirlle ao seu neto: "Ti tes máis sangue galego que Feijóo".
Unha clara estratexia de Vox para tentar apañar votos no tradicional electorado popular, galegofalante, de aldea, con sentimentos galeguistas pero tamén españois. Por iso, Abascal utiliza a súa avoa que fala practicamente todo o vídeo en galego e chega a dicir que ela é “fondamente galega”, pero que o galego, como o vasco, “vale para aquí e o español é mundial”.
“Eu nacín en Canaval, provincia de Lugo, e crieime en Padrón, polo destino do meu pai, que era da Renfe”, destaca María Jesús Álvarez, que lembra a dura vida da súa infancia e a do seu pai, así como a fame que pasaron durante a postguerra da ditadura de Franco., unha época da que, curiosamente, se sinte orgullosa a dirección de Vox.
