A Mariña sálvase loitando

O nacionalismo asume a esperanza do povo galego. Mais querer rachar co “Encorsamento” que padecemos e acalar as voces daqueles que o xustifican, precisa da participación consciente da maior parte posíbel da sociedade galega. Compre analisar cada circunstancia nova sen rixidez para maniobrar correctamente na conquista do maior apoio social posíbel. Porque o problema non é só mudar a realidade. O máis difícil virá despois, cando teñamos que navegar nos temporais do insulto, da provocación, do boicot e das agresións daqueles que tentarán que nada mude na Nosa Terra.

Porque para a esperanza de PP-VOX, é que forzas políticas coma o BNG non axiten a concienciación galega, que non infundan espíruto de loita entre o descontento social. De facelo, de seguro que voltarán á calumnia contra o nacionalismo, tachandoo de radical- batasuno. Porque precisamente o seu obxectivo consiste en promover a desideoloxización e manter esta dependencia material, paradoxicamente no País co maior potencial productivo do Estado.

Arestora hai un conflicto político-social-laboral aberto na Mariña Lucense. Como se ten dito, nel misturase espolio dos recursos naturais, privatización do público, insalubridade laboral, portas xiratorias e o desinterese político polos noso futuro. Como acontece co naval, coa banca, co sector lácteo, …non virá solución de fóra. Polo tanto, fai falla espertar ao povo. Falarlle na súa lingua e de forma clara. Sen agochos nin frases feitas. As nosas clases dirixentes, e o nacionalismo-galeguismo en xeral, deben ser quenes de elevar este conflicto a un novo escenario, de avanzar un chanzo na concienciación nacional. De ampliar a resposta social a un contexto de País, entroncando A Mariña coa situación de Emerxencia Nacional que se vive no País. Porque é nestas loitas, e non nos petit comités, onde se formará a verdadeira e única base para acadar máis soberanía. É destas loitas, de onde sairán, non só os apoios, senón tamén os nomes dos cadros políticos que consolidarán un futuro para este País.

Xose Rios Cidrás.

Ex secretário Comarcal CIG-A Mariña 2000-2003.