Por Galicia Confidencial | Santiago de Compostela | 26/06/2020 | Actualizada ás 08:35
A Rede Europea contra a Pobreza e a Exclusión Social (EAPN Galicia) reclama a atención dos diferentes actores políticos e sociais sobre os índices de pobreza en Galicia. O motivo é a crise sanitaria e social causada pola COVID-19 e que, segundo esta ONG, pode deixar milleiros de persoas na pobreza na comunidade.
Desde EAPN Galicia sinalan que a emerxencia sanitaria “está sendo acompañada por unha emerxencia social” que empobrecerá drasticamente a milleiros de persoas en Galicia. A isto engaden a falta de compromisos políticos por parte de Xunta e Concellos para frear o empobrecemento da poboación.
Así mesmo, a ONG sinala que esta crise supón a constatación da necesidade de aplicar con urxencia reclamacións propostas desde organizacións do Terceiro Sector. Entre elas a valoración dos coidados, a erradicación do lucro na loita contra a pobreza ou a atención ás persoas dependentes, así como a colectivos vulnerables e a aprobación do Ingreso Mínimo Vital.
Ademais disto, propoñen blindar a RISGA, garantir o dereito á vivenda, reducción da pobreza e da exclusión infantil, eliminar a descoordinación entre organismos públicos ou emprego digno. Para materializar isto propoñen catro puntos que van desde loitar contra as causas da pobreza e a desigualdade. O compromiso en orzamentos e planificación a medio e longo prazo e a coordinación política e técnica entre as administracións e organizacións para reducir a burocracia. Diálogo civil e recoñecemento lexislativo e marco estable de dialogo e financiamento do Terceiro Sector de Acción Social.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.