CESM pide que os centros comarcais de saúde "recuperen a autonomía na súa xestión"

Unha representación do Comité Executivo da Confederación Estatal de Sindicatos Médicos en Galicia (CESM), encabezada polo seu presidente, Ramón Barreiro, mantivo un encontro telemático coa candidata do BNG ao Parlamento galego pola provincia de Pontevedra, Montse Prado, na que se puxo de manifesto que comparten "a necesidade" de que os centros comarcais de saúde "recuperen a autonomía na súa xestión".

Así o informou CESM nun comunicado, no que aposta por que "se poña fin ao modelo centralizador e dependente dos hospitais de referencia, porque demostrou a súa ineficacia e ineficiencia".

Este sindicato médico tamén solicitou que "impulsen a conciliación efectiva do persoal sanitario" xa que, abunda, "como as estatísticas demostran, hai unha maioría de mulleres a quen lles resulta practicamente imposible conciliar vida laboral e familiar e moitas teñen que acabar renunciando ao exercicio da súa profesión polos horarios, quendas e gardas que se lles esixen".

CESM tamén expuxo á representante do BNG "a conveniencia de recuperar os dereitos perdidos por mor da crise económica de 2009, antes de que as condicións laborais se poidan ver afectadas de novo negativamente como consecuencia da pandemia da COVID-19".

Ademais, lembraron que, "xunto aos recortes salariais, tamén perderon os días de libre disposición" e, neste sentido, aproveitaron para reivindicar que os días 24 e 31 de decembro "sexan non laborais para o persoal sanitario da Xunta, como o é xa para o resto dos traballadores da Administración autonómica".

Esta central sindical tamén expoño á candidata "outras demandas históricas ás que o PPdeG non deu resposta", indicou CESM, tales como a "xornada semanal de 35 horas e a implantación dunha xubilación flexible entre os 60 e 70 anos para o persoal sanitario", medidas que, ao seu xuízo, "contribuirán a saír da precariedade laboral que os profesionais sanitarios veñen padecendo cos reiterados gobernos de Núñez Feijóo".

Reunión de representantes do sindicato médico CESM con PPdeG.. CESM