Os animalistas celebran a suspensión da Rapa das Bestas e reclaman a súa "reconversión"
Os animalistas xa advertiran de que "a exclusión do gando equino" da lei galega de benestar animal de 2017 "levaría unha falta de medidas activas" para protexer a estas especies durante estes espectáculos.
Por Europa Press / Redacción | PONTEVEDRA | 19/07/2020 | Actualizada ás 12:32
A asociación animalista Libera aplaude a decisión da asemblea veciñal de Sabucedo, na Estrada, de suspender por motivos sanitarios a popular Rapa das Bestas, un festexo declarado de interese turístico internacional que ademais piden "reconverter" de cara á edición do 2021.
A través dun comunicado, este colectivo defende, con máis de 168.000 firmas recollidas na plataforma 'Change.org', que hai que repensar esta celebración e reclama á Xunta "maior implicación, non simples permisos para realizar os curros nas diferentes localidades".
Os animalistas xa advertiran de que "a exclusión do gando equino" da lei galega de benestar animal de 2017 "levaría unha falta de medidas activas" para protexer a estas especies durante estes espectáculos. De feito, Libera asegura que algunhas tradicións de trato dos exemplares da Rapa de Sabucedo serían "sancionables" se se tratase de animais domésticos ou de gando vacún ou porcino.
"Os gandeiros deben coidar e garantir o benestar e a saúde dos animais durante todo o ano, non só durante unha xornada", inciden os animalistas, que expoñen que a reconversión desta festa leve "axudas económicas e técnicas para garantir estas situacións".
E é que a asociación animalista admite que o "carácter etnográfico" da Rapa das Bestas e o seu "peso histórico" son algo "que non se pode negar", aínda que avoga por que as tradicións evolucionen "de acordo aos tempos e ás esixencias cidadás de maiores estándares de protección".
