Segue sen control o incendio de Cualedro que xa arrasou máis de 1.000 hectáreas en menos dun día
Mobilizados efectivos da UME para loitar contra as lapas. O lume obrigou a desaloxar a algúns veciños en Monterrei e un brigadista foi asistido pola intensa calor
Por Europa Press / Redacción | OURENSE | 29/07/2020 | Actualizada ás 22:48
O incendio de Cualedro, que obrigou a declarar Situación 2 e a desaloxar a varios veciños por ameaza das súas casas no municipio veciño de Monterrei --parroquia de San Cristovo--, segue sen control na mañá deste xoves tras converterse no peor do ano e arrasar un milleiro de hectáreas.
Segundo a Consellería de Medio Rural no seu boletín sobre a situación dos incendios ás 9,00 horas, "non hai perigo para ningún núcleo de poboación", aínda que permanece activada como medida preventiva a Situación 2. O lume iniciouse o mércores ás 14,15 horas na parroquia de San Millao, en Cualedro, e continúa activo este xoves, aínda que "evoluciona favorablemente", segundo este departamento.
Este gran incendio --a partir de 500 hectáreas-- afectou tamén a terreos agrícolas e a viñas. Polo momento, mobilizou a 12 avións, 11 helicópteros, 17 motobombas, 51 brigadas, 17 axentes e un técnico.
Coa evolución do incendio, que avanza a gran velocidade, foi necesario activar tamén a efectivos da Unidade Militar de Emerxencias, que se suman aos numerosos medios que traballan sen descanso na zona.
Ademais, segundo fontes das brigadas, a intensa calor provocou que un dos bombeiros forestais que loitan contra as chamas tivese que ser evacuado en ambulancia a un centro hospitalario, aínda que o seu estado, nun principio, non é preocupante.
A situación prodúcese nun momento de alto risco de incendios en toda Galicia e cando aínda permanece controlado o lume que desde a semana pasada afecta tamén o municipio de Monterrei, que queimou unhas 720 hectáreas.
