Avisan de importantes danos de xabaríns en zonas nas que a seca adianta a maduración do millo

Unións Agrarias asegura que a falla de choivas de xuño e xullo están a provocar perdas importantes que "poden ir a máis" se non chove.

Por Europa Press / Redacción | SANTIAGO DE COMPOSTELA | 06/08/2020 | Actualizada ás 12:08

Comparte esta noticia

Unións Agrarias (UU.AA.) avisou de que se están producindo danos pola presenza de xabaríns nas zonas nas que a seca está a adiantar a formación da espiga do millo e que isto está a provocar que a preocupación dos produtores vaia en aumento.

A tempada, indicou o sindicato agrario nun comunicado este xoves, está a vir "cunhas importantes reducións da calidade da forraxe", cunha redución de ata o 30 por cento na produción derivada da falta de choivas en xuño e xullo.

A caída "irá a máis" se non hai precipitacións significativas nas próximas semanas, agregou. A isto súmase a presenza de mandas de xabaríns que danan os cultivos, aos que se achegan cando empeza a saír a espiga do millo.

UU.AA. asegurou que en Galicia se cultivan unhas 69.000 hectáreas de millo forraxeiro, cun valor económico duns 100 millóns de euros e que se usa para os animais de explotacións de leite e carne, para as que alimentar ao gando chega a supor o 60 por cento dos custos.

No seu comunicado, a organización lembra que a Consellería de Medio Ambiente autorizou na orde de vedas de maio a modalidade de caza á espreita, na que unha parella de cazadores espera aos animais. Esta alternativa, que ata agora non estaba autorizada en Galicia, permite "un control dos danos máis eficaz" que as esperas e non ten "as complexidades" das batidas, defendeu UU.AA.

En calquera caso, a organización agraria pediu aos agricultores e gandeiros que "esixan accións de control do xabaril" con espreitas e que a Consellería divulgue a posibilidade de recorrer a esta modalidade de caza.

Imaxe de recurso dun Xabaril.. XUNTA DE ESTREMADURA - Arquivo
Imaxe de recurso dun Xabaril.. XUNTA DE ESTREMADURA - Arquivo | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta