Que acontece cos empregados do fogar que se contaxian de covid?
A CIG pide que a infección destes traballadores sexa considerado accidente laboral e esixe á administración que "obrigue" ás familias a portar máscara no fogar "mentres os empregados prestan servizo".
Por Galicia Confidencial | SANTIAGO DE COMPOSTELA | 12/08/2020 | Actualizada ás 14:25
Debería ser considerado como accidente laboral o contaxio por covid-19 do persoal dos servizo de axuda no fogar? Dende a formación sindical CIG consideran que si e instan ó Goberno a modificar o real decreto que rexe este suposto, "que si inclúe os traballaodres e traballadoras dos centros sanitarios e sociosanitarios", destacan.
O responsable de Organización da CIG-Servizos, Pedro Pérez, destaca a "necesidade" de ampliar o suposto do real decreto Lei 19/2020 do 26 de maio ao persoal do fogar porque este está "igualmente exposto ás infeccións do virus SARS-CoV2" que os traballadores dos centros sanitarios e sociosanitarios. Á parte, destacan o papel destas persoas na "exposición e extensión do virus", xa que adoitan "estar traballando con persoas especialmente vulnerables" e "con importante risco de contaxio" no seu propio domicilio.
MÁSCARA NA CASA
Ante esta circunstancia insisten en reclamar que o persoal dos servizos de axuda no fogar sexa considerado un grupo de risco. “As Administracións teñen que adoptar as medidas preventivas adecuadas nos propios domicilios, obrigando a toda a unidade familiar a manter a distancia física de seguridade e a usar máscara mentres os traballadores/as prestan servizo nos fogares”.
