Por Europa Press / Redacción | SANTIAGO DE COMPOSTELA | 17/08/2020 | Actualizada ás 10:07
A área sanitaria da Coruña e Cee comezará este luns co cribado centrado en colectivos especialmente expostos ou sensibles e concedeu citas para realizar probas nos concellos de Abegondo e Bergondo.
O presidente da Xunta en funcións, Alberto Núñez Feijóo, avanzou o pasado mércores, tras a reunión do comité técnico, unha serie de medidas para a zona, que é a máis afectada na actualidade pola COVID-19 e concentra máis do 60 por cento dos casos activos. Entre as propostas están realizar unha serie de PCR a colectivos expostos e a persoas no grupo de idade entre os 18 e os 40 anos.
Fontes sanitarias indicaron o domingo que, ademais de manterse as actuacións establecidas ata o momento, hoxe comezan estas probas, para o que se utilizarán as listaxes proporcionadas polos concellos.
Pola tarde, os equipos realizarán as probas en Abegondo e Bergondo e ao longo da semana a área sanitaria avanzará nas tarefas noutras zonas para logo incorporar a outras persoas de distintos grupos e colectivos ao cribado. O sábado, destacaron as mesmas fontes, fixéronse 1.092 probas PCR na área sanitaria, que ten 778 casos activos na actualidade.
O conselleiro de Sanidade en funcións, Jesús Vázquez Almuiña, explicou o domingo, nunha entrevista á Radio Galega recollida por Europa Press, que o obxectivo é facer probas a colectivos con "contacto diario con poboación", como policías e traballadoras do servizo de axuda no fogar, e tamén "aos máis novos".
As probas a persoas de entre 18 e 40 anos comezarán tamén a semana que vén, dixo e apuntou que, en conxunto, poderían alcanzarse as 40.000 probas na área sanitaria con este sistema. O obxectivo é atopar "pacientes asintomáticos" que poderían transmitir a enfermidade sen sabelo, expuxo.
PECHE OCIO NOCTURNO
Por outra banda, o peche total do lecer nocturno na comunidade galega é efectivo desde as 00,00 horas deste luns. Trátase dunha das medidas pactadas na reunión extraordinaria do Consello Interterritorial do Sistema Nacional de Saúde celebrada o venres.
Segundo a orde publicada este sábado no Diario Oficial de Galicia (DOG) só se pode exceptuar o uso de máscaras para fumar cando se garanta unha distancia de dous metros, incluídas as terrazas e os espazos ao aire libre.
A Xunta modifica as accións aplicadas no territorio e esténdeas tanto a cigarros electrónicos como a calquera dispositivo de inhalación de tabaco ou similares, como pipas de auga ou cachimbas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.