A empresa fará tests de saliva ao persoal de condución e aos acompañantes do transporte escolar
As primeiras probas realizaranse "de forma masiva a todo o persoal de condución e acompañantes vinculados ao transporte escolar", segundo apunta.
Por E.P. | SANTIAGO DE COMPOSTELA | 08/09/2020 | Actualizada ás 17:02
Monbus fará máis de 2.000 test de saliva para detectar posibles casos de covid-19 entre o persoal de condución e os acompañantes vinculados ao transporte escolar.
A empresa destaca que o seu obxectivo é "reforzar, aínda máis se cabe, os protocolos elaborados desde as administracións" ante a volta ás aulas e o escenario de "incerteza" actual, "para ofrecer as máximas garantías de seguridade no transporte escolar".
Por iso, asinou un acordo co Instituto de Estudos Celulares e Moleculares (ICM), único centro privado acreditado polo Instituto de Saúde Carlos III con sede en Lugo, para a realización de máis de 2.000 test.
As primeiras probas realizaranse "de forma masiva a todo o persoal de condución e acompañantes vinculados ao transporte escolar", segundo apunta.
A maiores das probas que se realicen coincidindo co arranque do curso, Monbus destaca que "as actuacións se manterán ao longo de todo o ano escolar tendo en conta os posibles escenarios que poidan xurdir".
Engade que "proximamente, esta mostraxe farase tamén extensible ao resto de persoal de Monbus co obxectivo de protexer tanto a súa propia saúde como a das persoas usuarias que gozan do servizo".
Monbus e o ICM deseñaron "unha estratexia conxunta" para o rastrexo preventivo "masivo" do persoal de Monbus, segundo a compañía, que indica que a este estudo incorporaranse as análises por PCR directa a partir de saliva, "un método novo pola súa maior sensibilidade na detección do virus e pola súa facilidade de manexo".
Esta técnica, xa utilizada e validada en colectivos sensibles en Estados Unidos como a NBA, "foi posta a punto por ICM con éxito e está dispoñible para que empresas pioneiras como Monbus", resalta a empresa.
RASTREXO Á FROTA
Así mesmo, indica que esta estratexia incluirá tamén o rastrexo á frota de vehículos, xa que se incorporarán probas para realizar comprobacións sobre a presenza do virus nos autobuses.
"Un elemento máis de seguridade que se engade aos protocolos de desinfección diaria establecidos, que inclúen a aplicación de xeradores de ozono e virucidas específicos, ademais da utilización de deterxente con compoñente virucida nos trens de lavado", subliña.
