Sanxenxo, Meis e O Barco volven á segunda etapa do confinamento e Ourense limita a 5 persoas as reunións

Os municipios pontevedreses de Sanxenxo e Meis e o concello ouresano do Barco de Valdeorras súmanse desde a medianoite do xoves ás localidades con restricións extraordinarias para combater o avance da pandemia.

Así o ditou a Consellería de Sanidade este mércores tras a reunión do comité clínico para a xestión da pandemia, que tamén acordou limitar a cinco persoas as reunións permitidas aen Ourense, cidade na reforzarase o control e a vixilancia con patrullas da Policía Autonómica.

Ademais, a Administración galega levanta as restricións na Coruña, Lalín, Silleda e Vilaboa, que saen da lista de concellos con medidas extraordinarias na que se manteñen Santiago, Lugo, Poio, Pontevedra, Marín, Ourense, Verín, Vilagarcía de Arousa, Vilanova de Arousa e a localidade do Milladoiro, en Ames.

Deste xeito, súmanse ás localidades con restricións especiais --aforamentos ao 50%, prohibido o consumo en barra ou limitacións nas reunións a dez persoas-- os concellos de Sanxenxo e Meis da comarca do Salnés, onde se sitúa a explotación avícola Avigal na que se detectou un brote con máis dun centenar de casos de covid-19.

Así mesmo, tamén se impoñen medidas extraordinarias no Barco de Valdeorras, municipio ourensán no que se rexistraron varios brotes nos últimos días. As medidas, pendentes de detallar nunha orde extraordinaria no Diario Oficial de Galicia, entrarán en vigor a partir da medianoite deste xoves e serán revisadas dentro dunha semana.

Desde o xoves tamén quedan prohibidas as reunións de máis de cinco persoas "tanto públicas como privadas" en Ourense ante a incidencia da pandemia na cidade e a constatación por parte do comité clínico de que "as reunións familiares e sociais están a ser a orixe da maior parte dos contaxios".

Un neno no interior dun piso en Santiago mentres sinala á rúa durante o confinamento

FIN DAS RESTRICIÓNS NA CORUÑA

Por contra, A Coruña quedará libre de restricións despois de case dous meses. A cidade herculina e a súa área de influencia foron o pasado 8 de agosto as primeiras zonas de Galicia nas que se aplicaron medidas extraordinarias pola súa situación epidemiolóxica.

Tamén se levantan en Lalín e Vilaboa, onde estaban vixentes desde o 12 de setembro, ademais de en Silleda, localidade pontevedresa nas que se aplicaron hai dúas semanas.