Aviso laranxa para este luns na Costa da Morte e todo o litoral de Pontevedra por ventos de forza 8
Meteogalicia tamén activou o aviso amarelo por acumulacións de máis de 40 litros por metro cadrado en 12 horas a partir do mediodía nas provincias da Coruña e Pontevedra, ademais de na montaña ourensá.
Por E.P. | Santiago de Compostela | 18/10/2020 | Actualizada ás 14:19
Meteogalicia activou para este luns o aviso laranxa por ventos de forza 8 na Costa da Morte e en todo o litoral da provincia de Pontevedra. Mentres tanto, o resto da costa e case todo o territorio da Comunidade galega permanecerán en aviso amarelo.
Segundo recolle Meteogalicia, a alerta laranxa no litoral occidental permanecerá en vigor entre o mediodía e as 15,00 horas do luns pola chegada de ventos de forza 8 desde o sur.
Ademais, o norte da costa coruñesa estará en nivel amarelo por ventos de forza 7, tamén desde o sur, pero desde as 9,00 da mañá do luns. Esta situación manterase polo menos até as 18,00 da tarde.
En terra, os refachos soprarán entre os 70 e os 80 quilómetros por hora na totalidade das provincias da Coruña e Pontevedra, o que obrigou a activar o aviso amarelo desde as 9,00 da mañá.
Mentres tanto, na comarca da Mariña e nas zonas de montaña de Lugo e Ourense espérase que o vento supere os 80 quilómetros por hora a partir das 15,00 horas da tarde.
En canto ás precipitacións, Meteogalicia tamén activou o aviso amarelo por acumulacións de máis de 40 litros por metro cadrado en 12 horas a partir do mediodía nas provincias da Coruña e Pontevedra, ademais de na montaña ourensá.
