Universidades aclara que cambiarán as datas das probas de Selectividade este ano
O que non vai cambiar é o deseño dos exames, que serán parecidos aos do pasado ano.
Por Europa Press / Redacción | MADRID | 30/10/2020 | Actualizada ás 13:10
O secretario xeral de Universidades, José Manuel Pingarrón, informou este venres de que este curso 2020/2021 "non haberá cambios substanciais" no deseño das probas da Avaliación de Bacharelato de Acceso á Universidade (EBAU), a antiga Selectividade, pero si nas datas da súa celebración. O que si cambiarán son as datas.
Así o explicou o secretario xeral nunha rolda de prensa ofrecida para abordar a partida asignada ao Ministerio de Universidades no proxecto de Orzamentos Xerais do Estado (PGE) para 2021, na que participou tamén o titular da carteira, Manuel Castells, e o subsecretario de Universidades, Luís Cerdán.
Desta forma, detallou que a semana pasada tivo lugar unha reunión cos responsables do Ministerio de Educación e Formación Profesional "para deseñar a convocatoria de EBAU" porque, segundo indicou, "está a empezar a ser moi urxente".
"Non haberá cambios substanciais con respecto á convocatoria do ano pasado, van manterse practicamente os mesmos criterios", declarou o secretario xeral de Universidades, que subliñou que terá que recibir o "visto e prace" dos órganos colexiados en cada un dos Ministerios, para comezar co trámite "a semana que vén xa", previsiblemente.
Así mesmo, José Manuel Pingarrón asegurou que o desexo de ambos os Ministerios é "garantir a calidade das probas" para o que se determinou que "unha das razóns fundamentais para non facer cambios é que os profesores dos institutos e colexios teñan unha seguridade de que non vai haber un cambio substancial con respecto aos temas que xa estivesen o ano pasado".
Finalmente, o secretario xeral de Universidades anunciou que "si haberá, probablemente, cambios nas datas", de forma que se volverá "ás anteriores, ás do ano pasado, para dar máis tempo a todos os actores e, sobre todo, ás universidades, para que leven a cabo os procesos de inscrición, matrícula, etc.".
