O SLG acusa de "triunfalismo" á Xunta co seu plan lácteo tras o peche da metade de granxas galegas desde 2009
O sindicato agrario lembra que Galicia pasou de ter unhas 13.000 explotacións leiteiras a menos de 7.000, "a pesar dos múltiples plans e estratexias anunciados na última década pola Xunta".
Por E.P. | SANTIAGO DE COMPOSTELA | 18/11/2020 | Actualizada ás 19:01
O Sindicato Labrego Galego (SLG) cargou contra o "triunfalismo" do presidente da Xunta, Alberto Núñez Feijóo, na presentación do "enésimo" plan para o sector lácteo, despois de que pechasen "a metade" das granxas galegas desde 2009.
Nun comunicado, a secretaria xeral do SLG, Isabel Vilalba, mostra a súa "perplexidade" ante a imaxe "idílica" exposta pola Xunta este mércores na presentación da estratexia para o sector lácteo a 2025.
Así, lembra que Galicia pasou de ter unhas 13.000 explotacións leiteiras a menos de 7.000, "a pesar dos múltiples plans e estratexias anunciados na última década pola Xunta".
Censura que Feijóo destacase un "lixeiro" ascenso no último mes no prezo que se paga aos produtores galegos --é de 32 céntimos por litro--, pero omitiese que é "o valor medio máis baixo do Estado e dos máis baixos da UE", así como que leva un ano á baixa.
Entre outros reproches, o Sindicato Labrego reproba que Feijóo e o conselleiro de Medio Rural, José González, "tampouco falaron de que, nos últimos meses, os contratos estiveron a negociarse á baixa, a miúdo baixo extorsión das industrias no caso de que os labregos se negasen a falsear a cláusula dos custos de produción".
