Por E.P. | OURENSE | 22/11/2020 | Actualizada ás 20:09
A concelleira do BNG en Ourense Ruth Reza pide ao goberno local de Ourense que "se poña as pilas" e reforce a área de Política Social do Concello con máis persoal: "Hai moito que facer e as necesidades hai que cubrilas xa, non se pode seguir esperando". A través dun comunidado, a edila nacionalista asevera que "non pode ser que as persoas que máis o precisan", como son os colectivos "en risco de exclusión social", vexan "atrasadas as súas citas para acceder aos recursos ata tres meses".
Ademais, o BNG asegura que o Centro de Información Municipal ás Mulleres (CIMM) da cidade das Burgas se atopa na mesma situación. "Se para este goberno a igualdade e a loita contra a violencia machista é unha prioridade, ou entendemos que debería selo, o primeiro que hai que facer é dotar de persoal o CIMM", insiste Reza.
A concelleira tamén explica que estas instalacións levan anos "traballando en precario cunha psicóloga-directora e unha xurídica". Ao seu xuízo, este centro precisa "como mínimo unha psicóloga a tempo completo, unha traballadora social e unha educadora social".
En definitiva, Ruth Reza reclama un cambio de políticas "e poñer ás persoas no centro", porque "está visto" que a xestión do PP tanto no Concello de Ourense --aínda que desde hai meses xa non forman parte do goberno local-- como na Xunta tiveron como consecuencia a consolidación da pobreza e a exclusión social".
LIMPEZA DO POLÍGONO DO TAMBRE
Por outra banda, en Santiago de Compostela, a edila do Bloque Navia Rivas esixe ao goberno de Xosé Sánchez Bugallo que elimine a maleza "que invade as beirarrúas" e as zonas de paso do Polígono do Tambre. "Isto débese a unha falta de mantemento ordinaria, a pesar de que son zonas moi transitadas tanto por persoas que van facer compras ou traballar a este polígono industrial como por quen opta por facer deporto ou pasear buscando novos espazos", asevera.
Entre os problemas que menciona Rivas, están silvas, falta de iluminación e un farol dobrado a piques de caer na rúa Castela e León.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.