Bugallo ve "razoable" pechar Galicia na ponte para evitar desprazamentos "masivos"
Agarda o levantamento do peche de Santiago e a apertura da hostalaría na cidade "este fin de semana".
Por E.P. | SANTIAGO DE COMPOSTELA | 30/11/2020 | Actualizada ás 13:30
O alcalde de Santiago, Xosé Sánchez Bugallo, considerou que sería unha medida "razoable" que a Xunta declarase o peche perimetral da comunidade durante a ponte, para evitar desprazamentos "masivos" que favorecesen a expansión da covid-19. "Probablemente paréceme unha idea bastante oportuna", destacou, a preguntas dos xornalistas en rolda de prensa.
No que respecta á capital galega, e cos datos dispoñibles, "se non empeoran a día de hoxe", opinou que tamén sería "razoable pensar nunha apertura da hostalaría para este fin de semana" e o levantamento tamén do peche perimetral que impide aos composteláns moverse a outros municipios galegos.
En canto ao peche de Galicia, cualificouno de "razoable" e equiparouno co que vai facer "a Comunidade de Madrid ou outras como Castela e León". Xustificouno, entre outras cuestións, "vendo os problemas" que, en canto á evolución do coronavirus, afectan a zonas como o norte de Portugal e a Castela e León. "Non me parecería ningún erro, se ese é o acordo que adopta a Xunta", insistiu.
No relativo a Santiago, reiterou que lle gustaría que deixase de existir a prohibición para os seus veciños de desprazarse a outras localidades e valorou como "razoable manter ese optimismo" á espera do que decida o Goberno galego.
