Veciños da mina de Touro protestan contra o proxecto de drenaxe de augas contaminadas ao río Portapego
Augas de Galicia deu autorización en outubro de 2020 ao proxecto de drenaxe temporal da mina de Touro, cuxas augas estancadas conteñen minerais pesados que poden contaminar o río Ulla e a ría de Arousa.
Por Galicia Confidencial | O Pino-Touro | 04/12/2020 | Actualizada ás 08:25
A Plataforma Veciñal Mina O Pino-Touro Non denuncia nun escrito a aprobación por parte de Augas de Galicia da drenaxe de augas encoradas en balsas dentro dos terreos da antiga mina de cobre entre os concellos de O Pino e Touro. Dita aprobación levanta as protestas de veciños e veciñas ao seren coñecedores da alta concentración de metais pesados e outros materiais contaminantes. A Plataforma denuncia que a apertura das balsas da mina podería contaminar o río Ulla e a ría de Arousa.
Acusan á Xefatura Territorial de Economía e Industria da Coruña de non ter exposto e permitir a participación pública para a elaboración do proxecto. A plataforma veciñal lembra que o obxectivo de calquera plan de restauración é a “rehabilitación dos espazos mineiros degradados”. Por tanto, un tratamento do terreo afectado polas actividades mineiras, isto último para devolver o terreo a un estado “satisfactorio”.
Os veciños e veciñas implicadas na plataforma contraria á mina, sinalan que o obxectivo da empresa, Explotaciones Gallegas SL, non cumpre a “condición principal para a drenaxe por non existir plan de restauración ambiental”.
As consecuencias desta operación de drenaxe na mina de Touro serían, entre outras, a alteración ou eliminación de cauces naturais, en vez de restauralos. Tamén se menciona a instalación de plantas de tratamento das drenaxes ácedas e sulfuros das augas. Estas instalacións poden “causar ao medio natural e aos recursos hídricos danos de imposible ou difícil reparación”.
