Falece un dos históricos xornalistas da TVG
Manuel Díaz Maseda era o actual coordinador de Informativos de TVG e unha das caras do ente público durante os gobernos do PP.
Por Galicia Confidencial | Compostela | 23/12/2020 | Actualizada ás 18:47
O xornalista da Televisión de Galicia Xosé Manuel Díaz Maseda faleceu este mércores en Santiago de Compostela despois de sufrir un grave accidente de tráfico o venres pasado. Xornalista e licenciado en Dereito, Díaz Maseda foi unha das caras coas que o 24 de xullo de 1985 arrancaron as primeiras emisións da canle galega.
Foi editor e presentador de informativos, e redactor xefe de Informativos entre 2009 e 2017. Actualmente, era coordinador de Informativos de Televisión de Galicia e cada día daba conta da última hora desde a redacción, con entradas en directo nos programas da mañá. Así mesmo, Xosé Manuel Díaz Maseda era representante de CRTVG nas comisións de Informativos de FORTA, a rede de televisións autonómicas públicas, nas que era un membro especialmente valorado pola súa veteranía e traxectoria.
Nun comunicado, a TVG lembra que Díaz Maseda foi enviado especial a innumerables acontecementos dentro e fóra do país. Entre outros, os actos do 25 de xullo, as campañas electorais autonómicas, xerais e europeas, as sesións constitutivas do Parlamento de Galicia e sesións de investidura, ou emerxencias como o accidente do barco Discoverer Enterprise que destruíu en 1998 a ponte das Pías en Ferrol e desde onde informou en directo.
