O "insulto" da Xunta ás enfermeiras temporais: 164 prazas fixas para 35.000 sanitarios

Proseguen as mobilizacións no sector sanitario galego contra a xestión da administración autonómica. Aínda que as denuncias do profesional médica veñen de lonxe en Galicia, a presión acumulada tras nove longos meses de pandemia está a facer que aboien con renovadas forzas moitas das demandas sostidas ao longo dos anos pasados. Tal é o caso da temporalidade do Servizo Galego de Saúde, unha circunstancia da que Galicia Confidencial xa informou en numerosas ocasións.

Agora, ao bordo do novo ano 2021, o colectivo de Enfermeiras Eventuais en Loita vén de lanzar un novo berro de denuncia contra o que, consideran, consiste nun novo “abuso” por parte da Xunta de Galicia: a derradeira oferta de emprego público. A convocatoria, publicada do DOG escasos días atrás, vén de recoller a indignación do colectivo de enfermaría por tratarse dun número moi reducido aos seus ollos: 164 prazas.

Aínda que a cifra pode semellar elevada, queda moi curta ao carón das estimacións ofrecidas por fontes sindicais a GC uns meses atrás: 35.000 profesionais. É por isto que dende Enfermeiras Eventuais en Loita anuncian mobilizacións “en diferentes puntos da xeografía galega”. Segundo destacan, estas manifestacións terán lugar mantendo os protocolos de seguridade e coa vista posta en “denunciar o insulto da Administración autonómica e estatal aos seus traballadores”

40% DE TEMPORALIDADE 

As críticas da agrupación sanitaria chegan logo duns meses de extraordinaria presión nos que, destacan, “a Administración  apoderouse da excepcionalidade para restrinxir e reducir os nosos dereitos”. Subliñan neste aspecto como certos líderes chegaron a “aproveitarse dos nosos esforzos para acadar puntos políticos”, á vez que “finxían premiar o noso traballo con recoñecementos e homenaxes públicos carentes de valor”.

Estas homenaxes saben hoxe amargas ao colectivo sanitario porque, tras toda a pompa e agasallos, advirten como a temporalidade do persoal sanitario “deixou de ser un episodio agudo para converterse nunha patoloxía crónica”. Por iso falan das 164 prazas convocadas como “cento sesenta e catro gargalladas con sarcasmo” proferidas “nos rostros de todas e cada unha das enfermeiras temporais que formamos parte deste Servizo Galego de Saúde, a vergoñenta cifra do corenta por cento do total”.