A aplicación galega do "tempo para xente intelixente"

Trátase dunha aplicación do tempo diferente. Nela déixase que sexa o usuario quen cree o seu propio prognóstico do tempo, baseándose nas imaxes animadas tanto de datos pasados (radar de chuvia, imaxes de satélite, etc.) como nas imaxes de predición para os vindeiros días.

Ademais, permite compartir as imaxes cos teus contactos, seguidores e amigos a través de Twitter, Facebook, email...A aplicación presenta un deseño completamente renovado, adaptado ao futuro iOS 7.

Smart GalApps promete que conxunto de datos irá aumentando periodicamente. Actualmente xa ofrece:

- Imaxes de radar de chuvia: da AEMET e MeteoGalicia, para a Península Ibérica, Portugal, España e a maioría das súas rexións

- Imaxes de satélite: da AEMET, MeteoGalicia, a IPMA e a NOAA, para todo o mundo, Europa occidental e África norte, Península Ibérica, España, Estados Unidos, Mar Caribe e Golfo de Mexico

- Imaxes de detección de raios: da AEMET, para España

- Imaxes de predición atmosférica: de MeteoGalicia, para temperatura, chuvia, vento, nubosidade, humidade relativa e neve de Europa occidental e África norte, Península Ibérica, Galicia e Norte de Portugal, e as 4 provincias galegas: A Coruña, Lugo, Ourense e Pontevedra

- Imaxes de predición oceanográfica: de MeteoGalicia, para temperatura da auga e altura das ondas do océano Atlántico

A aplicación está dispoñible de balde no App Store para iPhone, iPod Touch e iPad e nuns días tamén estará dispoñible para Android.