Por Galicia Confidencial | SANTIAGO DE COMPOSTELA | 12/01/2021 | Actualizada ás 09:30
O regreso ás aulas en xaneiro marca o inicio do segundo terzo do curso escolar pero, para unha serie de centros da comunidade galega, será algo máis. Neste 2021, case dez colexios e institutos de Galicia se sumarán ao proxecto educativo “Activistas polo mundo que queremos”, unha iniciativa de tres ONGs que conta con financiamento e apoio das institucións europeas e a Xunta.
O obxectivo do plan é "apoiar ao alumnado galego para que coñeza e se integre" no que os organizadores definen como un "movemento global de xuventude inspiradora", entre o que contan a activistas xuvenís como Gretta Thumberg, Malala, e Emma González. Baixo esta premisa, traballarán con máis de 500 alumnos para esperter neles o interese en "cambiar o mundo" para "mudar as cousas que non lles gustan"
"Con demasiada frecuencia os e as adolescentes son vistos como apáticos e egocéntricos", subliñan dende a organización a respecto dunha perspectiva que preteden desbotar. Destacan, neste aspecto, a presenza dunha "nova xeración de mocidade" que "está demostrando que moitos mozos e mozas están, de feito, moi preocupados polos problemas sociais, políticos e ambientais, e están completamente preparados para facer algo ao respecto".
Con esta premisa en mente, o proxecto arrinca este luns 11 no CPI As Mirandas en Ares (A Coruña), o CPI Plurilingüe de Castroverde (Lugo) e na provincia de Pontevedra, o IES Primeiro de Marzo de Baiona, IES Miguel Ángel González Estévez de O Carril en Vilagarcía de Arousa, o CPI do Toural de Vilaboa, e CPR Rosalía de Castro en Vigo. Será a oitava edición dun proxecto que xa achegou estas cuestións a "máis de 3.000 alumnos e alumnas dende o 2013", explican. Por mor da pandemia, a iniciativa incluirá este ano unha forte aposta pola educación virtual.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.