Por E.P. | SANTIAGO DE COMPOSTELA | 20/01/2021 | Actualizada ás 17:30
O BNG propón un plan de rexeneración das rías, cun investimento de 1.096 millóns, como proposta para ser financiada con cargo aos fondos de recuperación europeos Next Generation. A portavoz da formación nacionalista, Ana Pontón, presentou na Coruña unha iniciativa que, segundo expuxo, supón "un proxecto de país, que beneficia a economía real". "A un sector produtivo estratéxico de enorme repercusión en termos de emprego e de cohesión social".
A proposta expón a recuperación integral das rías a través de actuacións en tres áreas: rexeneración e recuperación ambiental; investigación científica e dixitalización; comercialización e transformación do sector produtivo derivado das rías.
COMISIÓN PARLAMENTARIA
Sobre a mesma, Pontón precisou que a trasladarán á comisión parlamentaria de reactivación económica e social co obxectivo de solicitar o apoio doutras forzas políticas, ao considerar, ademais, que encaixa nas políticas definidas pola Unión Europea para obter estes fondos.
"A Xunta debe recoller esta luva e esperamos que teña unanimidade para saír adiante", recalcou a este respecto. Ademais, dixo que "se algún proxecto encaixa ben nestes fondos é este, utilizalos para que as rías estean saneadas e rexeneradas e sexan motor de desenvolvemento económico".
Neste sentido, defendeu que a recuperación ambiental e produtiva das rías debe de ir acompañada da investigación científica, a dixitalización e a comercialización da actividade marisqueira, cunha colaboración público-privada.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.