Hortensia causa 200 incidencias ao seu paso por Galicia, a maioría por caídas de árbores
Os servizos de emerxencia atenderon 23 incidencias na cidade de Vigo, onde houbo cortes de luz.
Por Europa Press / Redacción | SANTIAGO DE COMPOSTELA | 22/01/2021 | Actualizada ás 10:33
A borrasca 'Hortensia' que mantén en aviso laranxa a toda a Comunidade galega por risco de ventos de máis de 100 quilómetros hora e fortes precipitacións causou unhas 200 incidencias durante a madrugada do venres, a maioría relacionadas coa caída de árbores e ramas en estradas.
A provincia máis afectada, segundo o balance ofrecido na mañá deste venres polo CIAE 112 Galicia, foi a de Pontevedra, que suma 133 das case 180 incidencias rexistradas nas últimas horas. O resto repártense entre A Coruña (21), Ourense (10) e Lugo (9).
En total, 85 dos avisos xestionados pola central do 112 foron por caídas de árbores e ramas que afectaron a vías de circulación. Destacan os catro cortes en puntos distintos da A-55 debido a troncos desprendidos que caeron sobre o pavimento. Así mesmo, tamén se produciron desprendementos de terra e pedras causados polos fortes ventos, que alcanzaron picos de máis de 110 quilómetros por hora tanto en puntos da costa como do interior.
En Soutomaior (Pontevedra), varios coches sufriron danos debido á caída de tellas provocadas polo vento, que tamén levou un tellado de uralita en Redondela (Pontevedra) ou un panel de obra que tirou parte dun muro dunha casa en Tomiño (Pontevedra).
Ademais do vento, a choiva tamén deixou incidencias que afectaron a vivendas e estradas que se viron alagadas. O 112 resalta o sucedido en Padrón (A Coruña), onde os efectivos de Protección Civil cortaron unha pista local que une Cambelas con Lamego pola crecida do río Sar. Así mesmo, a borrasca 'Hortensa' provocou cortes de luz en San Cibrao das Viñas (Ourense), puntos da cidade de Vigo, Cartelle (Ourense) e Moaña (Pontevedra).
23 INCIDENCIAS EN VIGO
En Vigo, os bombeiros atenderon 23 incidencias causadas polos fortes ventos rexistrados e que se saldaron con varios danos materiais, segundo explicaron fontes do servizo a Europa Press.
En concreto, produciuse a caída dunha antena na zona de Jenaro de la Fuente, así como as de chapas dos tellados de tres edificios situados na rúa Camelias. Ademais, os bombeiros desprazáronse á rúa Pintor Colmeiro tras ser alertados de que o toldo dunha panadaría soltouse e comezara a golpear a cristaleira exterior da mesma. Mentres, unha árbore caeu sobre o cableado eléctrico en Zamáns.
Así mesmo, producíronse desprendementos de árbores sobre a vía pública nas rúas Areal e Castrelos, a estrada de Fragoselo, a zona de Cabral e a estrada da Madroa, onde tamén tivo lugar a caída dun poste.
Os bombeiros actuaron ademais na praza do Berbés e as rúas Enrique Lorenzo e Doutor Corbal despois de que tres árbores impactasen sobre tres vehículos e, no último caso, tamén contra a fachada dun edificio. Adicionalmente, constatouse que varios paneis situados na zona da avenida de Madrid e unha chapa do tellado do centro comercial A Laxe soltáronse e que un semáforo caera sobre un vehículo na rúa Ramiro Pascual.
