A pandemia leva destruídos 15.000 empregos en Galicia

Galicia pechou 2020 cun total de 142.600 desempregados, 3.200 menos que en 2019, o que supón unha baixada do paro do -2,16%, segundo os datos da Enquisa de Poboación Activa (EPA) feita pública este xoves polo Instituto Nacional de Estatística (INE). Deste xeito, Galicia é unha das tres comunidades nas que baixa o paro en 2020 xunto con Estremadura (-12,2%) e Murcia (-5,5%).

En cambio, a pandemia destruíu 15.000 empregos (-1,37%) en Galicia ao longo do ano en comparación con 2019, de forma que acaba 2020 con 1.080.900 ocupados. Respecto da comparativa intertrimestral, destruíronse 1.600 empregos os últimos tres meses do ano na comunidade galega. Un 0,15% de diminución, que contrasta co avance da media española (+0,87%).

A taxa de paro queda en Galicia no 11,66%, case idéntica á que había un ano antes. É a quinta máis reducida entre comunidades, despois de País Vasco (9,96%), A Rioxa (10,36%), Castela e León (11,61%) e Navarra (11,65%). Está máis de catro puntos por baixo da media española (16,13%).

FAMILIAS ENTEIRAS NO PARO

O número de fogares galegos con todos os seus membros en paro situouse en 51.000 ao peche de 2020, o que supón 3.000 menos (-2,4%), segundo os datos que publica este xoves o Instituto Galego de Estatística (IGE). Este ritmo de baixada é superior ao que se produciu en 2019, cando houbo un descenso de 1.900 fogares con esta tipoloxía. Na comparativa do cuarto co terceiro trimestre, houbo unha redución de 2.200 fogares con todos os seus membros en paro. Neste caso trátase dun descenso do 4,1%.

Pola súa banda, hai 614.400 fogares no que todos os seus membros son ocupados, o que supón 1.800 máis que un ano antes, un 0,3% máis en termos relativos. Do total de 1.104.100 fogares galegos, había 742.800 con, polo menos, un activo (-0,3% interanual). Mentres, os fogares nos que hai ningún membro activo van á alza ata 361.300, son 6.200 máis (+1,7%).

O DESEMPREGO DIMINÚE MÁIS ENTRE AS MULLERES

En 2020, o paro baixou máis entre as mulleres (en 2.200, -2,8%) que entre os homes (en 800, -1,2%) na comunidade galega. Hai 65.400 homes desempregados, cunha taxa de paro do 10,3%. Con todo, son 77.300 mulleres desempregadas, cunha taxa do 13,2%, tres puntos por encima da masculina. Pola súa banda, a destrución de emprego afectou máis as mulleres (9.400 ocupadas menos, -1,8%) que aos homes (5.700 ocupados menos, -1%).

Por sectores, servizos lidera a destrución de emprego en termos absolutos (10.900 ocupados menos en 2020, -1,4%), seguido pola industria (9.100 ocupados menos, -5%). En contraposición, creouse emprego en agricultura e pesca (4.000 máis, +6%) e en construción (1.000 máis, +1,3%). En comparación co terceiro trimestre, no último do ano créase emprego no sector servizo (6.200 máis), pero prodúcese un retroceso no resto.

ESBORRALLE DA CONTRATACIÓN TEMPORAL

En Galicia, había 871.700 persoas asalariadas no cuarto trimestre (-1,3%), 660.300 con contrato indefinido e os 211.400 restantes con temporal. Así, a contratación indefinida incrementouse en 0,9% en 2020 en comparación con 2019 (5.900 persoas máis). Mentres, os temporais esborralláronse un 7,6% (17.500 persoas menos).

O PARO XUVENIL DISPÁRASE

Dos 318.700 mozos galegos de entre 16 e 29 anos, 103.400 (o 32,44%) están ocupados, 36.900 (o 11,58%) parados e os 178.400 (o 55,98%) restantes son inactivos. A taxa de ocupación deste colectivo sitúase no 32,5% no cuarto trimestre de 2020. Supón unha caída de seis puntos respecto dun ano antes. De tal forma, a taxa de paro xuvenil dispárase en Galicia ata o 26,3%, máis de cinco puntos respecto de 12 meses antes.

O 77,6% dos ocupados de entre 16 e 29 anos traballa a xornada completa. Con respecto ao terceiro trimestre de 2020, esta cifra diminúe un 7,3%, mentres que os ocupados a xornada parcial aumentan en 1.600. Fronte ao cuarto trimestre de 2019, diminúe a ocupación xuvenil que traballa a xornada completa (en 10.300 persoas) e a ocupación a xornada parcial (en 8.200 persoas).

PERDA DE 18.200 ACTIVOS

A EPA publicada este xoves tamén recolle que a poboación de 16 anos e máis en Galicia sitúase en 2.339.600 persoas, das cales 1.223.500 se clasifican como activas, o que sitúa a taxa de actividade no 52,3%. O número de activos redúcese en 18.200 persoas en comparación co que se acabou 2019. A taxa de actividade retrocede 0,8 puntos.

SETE CIDADES

Entre as sete cidades, Santiago conta coa taxa de paro máis baixa ao termo de 2020 (7,5%), seguida de Lugo (7,9%). No outro extremo atópase Ferrol (18,4%). Santiago e Lugo son os que presentan maiores taxas de ocupación, co 55,8% e 54,6%, respectivamente. Ferrol é a cidade con menor taxa de ocupación (o 34,4%).

ESPAÑA

En España, o mercado laboral notou os estragos da Covid en 2020 ao rexistrar unha subida do paro de 527.900 persoas, o que supón un 16,5% máis que en 2019, e un retroceso da ocupación de 622.600 traballadores (-3,1%), reflectindo en ambos os casos os peores datos anuais da EPA desde o ano 2012. A subida do paro en 2020 pon fin a unha serie de sete anos de descensos. No caso da ocupación, levaba seis anos crecendo, desde 2014, pero o dato de 2013 (-204.200 postos de traballo) é mellor que o experimentado no ano do Covid.