Santiago terá cámaras 'intelixentes' para controlar a mobilidade de peóns e vehículos

O proxecto 'SMARTiago' dará un paso máis en materia de xestión de mobilidade urbana. A capital galega instalará un sistema de cámaras intelixentes que, entre outras funcionalidades, facilitará información para regular os fluxos de peóns e vehículos e servirase de modelos predictivos para a toma de decisións.

Os traballos de instalación do sistema estarán a cargo da empresa Kapsch, beneficiaria da licitación de compra pública innovadora do proxecto por importe de 1.412.000 euros, segundo detallaron en rolda de prensa o concelleiro de Turismo, Sindo Guinarte e o edil de Seguridade Cidadá, Gonzalo Muíños.

O acto contou coa presenza do responsable de Cidades de Kapsch, Juan Marín que insistiu en resaltar o carácter pioneiro do sistema, único no continente europeo, e entrou en detalle sobre a complexidade do proxecto que se instalará na cidade.

Unha das bases do sistema será a instalación de cámaras intelixentes que se servirán de algoritmos para a identificación de elementos.

O modelo previsto inclúe un total de 31 dispositivos para controlar a mobilidade de vehículos e outros 12 para os peóns, que se situarán nas zonas de maior concentración e circulación de persoas e automóbiles.

Este sistema conxugarase coa instalación doutros elementos, como redutores intelixentes da velocidade, que de forma global ofrecerán un volume de información que, a través dunha IA, permitirá simular escenarios e predicir posibles fluxos de mobilidade para poder regular e xestionar rutas, sobre todo no Centro histórico da cidade.

Deste xeito, configurarase un centro de control de mobilidade intelixente que, de forma virtual, integrará todos estes elementos e dispositivos e permitirá, entre outros, planificar rutas, axudar no movemento e entrega de mercadorías en establecementos e mesmo actuar e predicir aglomeracións de usuarios e persoas.

RASTREXABILIDADE DE PERSOAS E VEHÍCULOS

O sistema ofrecerá, así, unha predición do comportamento e mesmo unha rastrexabilidade de peóns e automóbiles. Deste xeito poderase potenciar a xestión e o control de accesos de vehículos de alta carga ao centro histórico, por exemplo, ou mesmo identificar se unha persoa leva mochila ou non.

O edil Sindo Guinarte explicou que a localización das cámaras decidiuse a partir do criterio dos técnicos do departamento de mobilidade e da Policía Local.

Neste sentido, sinalou que a información e a rastrexabilidade "de todos os elementos da cidade" permitirá indentificar un vehículo "desde que entra e desde que sae", se hai papeis na rúa, pintadas nas paredes e mesmo se unha persoa "é peregrino ou non".

Por iso, será un sistema "esencial para tomar decisións", sobre todo para identificar espazos de concentración importante de persoas, desviar fluxos de mobilidade e "garantir a seguridade".

"Permitirá coñecer e predicir como se vai a comportar un conxunto de persoas en certos momentos", engadiu, polo que permitirá ás autoridades "anticiparse a iso" e "evitar problemas" ao longo do Centro histórico da cidade.

"REFERENTE" EN EUROPA

Os traballos de instalación desta estrutura estenderanse durante 12 meses, aos que haberá que sumar outro seis de adestramento e aprendizaxe da tecnoloxía.

Respecto diso, o edil Gonzalo Muíños incidiu en que o sistema "vai marcar un antes e un despois" no modelo de concibir a xestión da mobilidade urbana.

"Vai ser algo novo en Europa e volvemos ser un referente a todos os niveis", destacou, para incidir en que os veciños da cidade serán "os beneficiados" desta iniciativa.