Sanidade convoca para un cribado a 12.000 persoas na área de Santiago para esta fin de semana
Estas 12.000 persoas foron convocadas en distintos horarios o sábado día 6 e o domingo día 7 e terán que desprazarse ata o recinto feiral de Amio, en Santiago de Compostela, para a realización das probas PCR.
Por E.P. | Santiago de Compostela | 04/02/2021 | Actualizada ás 20:35
A área sanitaria de Santiago de Compostela e Barbanza citou para este sábado 6 e domingo 7, a un total de 12.000 cidadáns de idades comprendidas entre os 41 e os 55 anos de idade para a realización de probas para detectar casos asintomáticos de covid-19.
En concreto, convocouse a 3.300 cidadáns de entre 41 e 50 anos de idade asignados a centros de saúde de Ames e a 8.700 persoas de entre 46 e 55 anos con cartón sanitario en centros de saúde de Santiago de Compostela.
Estas 12.000 persoas foron convocadas en distintos horarios o sábado día 6 e o domingo día 7 e terán que desprazarse ata o recinto feiral de Amio, en Santiago de Compostela, para a realización das probas PCR.
Estes cribados súmanse aos que o Sergas convocou no centro de saúde de Vedra este xoves e este venres. Para estas probas citouse a 840 cidadáns de entre 31 e 50 anos de idade.
O obxectivo da realización destas probas, destinadas a persoas entre 20 e 70 anos de idade, é captar o maior número posible de contaxiados asintomáticos, aínda que o índice de participación, salvo excepcións, non adoita superar o 60 ou 65 por cento dos convocados.
