Uns 200 traballadores da térmica das Pontes manifestáronse para pedir "unha transición xusta"
A mobilización, convocada pola Asociación de Transportistas do Carbón das Pontes, segue ás barricadas dos últimos días.
Por E.P. | SANTIAGO DE COMPOSTELA | 07/03/2021 | Actualizada ás 16:20
Uns 200 traballadores e as súas familias manifestáronse nas rúas das Pontes de García Rodríguez (A Coruña) na mañá deste domingo para demandar unha "transición xusta".
A mobilización, convocada pola Asociación de Transportistas do Carbón das Pontes (ATCAP) e secundada por traballadores da central térmica e as auxiliares, partiu sobre as 11,00 horas desde a zona da Vilabella, tras o que percorreu as rúas da localidade ata culminar na praza do Hospital.
A marcha estivo encabezada por un trailer que no seu remolque portaba varias pancartas con lemas que rezaban 'Temboury dimite. As Pontes non te quere' e 'Bogas dimisión. Págalle ás Pontes o que lles debedes', en alusión a directivos da empresa Endesa. Ademais, puidéronse ler outras consignas que apelaban á implicación do Goberno central e a Xunta e defendían "unha transición xusta".
A marcha iniciouse nunha das zonas desde as que o acceso á central térmica permanece bloqueado desde este xoves polos camioneiros e transcorreu sen ningún tipo de incidente. Así, a mobilización contou co apoio dos sindicatos CIG, UXT e CC.OO. e traballadores de empresas auxiliares e da propia Endesa, así como dos familiares destes últimos.
BARRICADAS
Esta manifestación tivo lugar despois de que este sábado se producisen cortes parciais nalgunhas das estradas de acceso ao centro urbano do municipio coruñés. Ademais, conformáronse barricadas con pneumáticos aos que posteriormente se lles prendeu lume, o que xerou intensas columnas de fume negro que se podían divisar a varios quilómetros de distancia.
O presidente da Asociación de Transportistas do Carbón das Pontes, Manuel 'Cholo' Bouza, asegurou que o bloqueo á central térmica de Endesa "continuará" mentres o sector "non teña un compromiso firme de que se fará unha transición xusta". Neste sentido, emprazou a Endesa, o Ministerio para a Transición Ecolóxica e o Reto Demográfico, a Xunta e o Concello das Pontes a "sentar a negociar" de modo "serio". Ademais, advertiu de que os transportistas están "fartos" de promesas.
