Todas as grandes áreas metropolitanas de Galicia están abertas desde este luns

O subcomité clínico de expertos reunido o venres decidiu abrir o peche perimetral das áreas sanitarias da Coruña e Pontevedra, as dúas que permanecían pechadas en Galicia, co que os seus municipios quedan limitados en mobilidade unicamente en función da súa incidencia. A medida entrará en vigor ás 00,00 horas do luns.

Así o explicou o conselleiro de Sanidade, Julio García Comesaña, durante a roda posterior á reunión, na que destacou que a incidencia continúa á baixa na comunidade e informou as normas de mobilidade que rexerán desde o luns.

En concreto, ademais de eliminar o perímetro destas dúas áreas, o comité subiu a nivel máximo aos municipios da Mezquita, Boborás e A Pobra do Brollón, que se suman ao de Soutomaior. Neste catro concellos, a hostalaría deberá permanecer pechada ao público e só poderá haber reunións de convivientes. Ademais, estarán pechados perimetralmente de maneira individual.

A maiores, quedan en nivel alto os municipios de Miño, Arteixo, Ponteceso e Sobrado dos Monxes, na área da Coruña; Cariño e Mugardos, na de Ferrol; Guitiriz, Lourenzá e Paradela, na de Lugo; Cambados, Ponte Caldelas e Vilanova, na de Pontevedra; e Mos, na de Vigo. Nestes concellos, a hostalaría só poderá operar en terraza, ao 50%, e a mobilidade está permitida unicamente entre eles, independentemente da área sanitaria na que se atopen.

No resto de concellos, a mobilidade está permitida entre os distintos municipios e a hostalaría poderá abrir ao 30% en interiores e ao 50% en exterior. Tanto no nivel medio como no alto, permítense reunións de non convivientes ata catro persoas e os hostaleiros teñen que pechar ás 18,00 horas.

Un axente da Policía Local dá o alto a un coche durante un control de mobilidade na saída de Santiago de Compostela cara á estrada de Ourense, no barrio de Castiñeiriño, en Santiago de Compostela.. Álvaro Ballesteros - Europa Press