A Xunta renova o convenio coa asociación de cans de rescate Casaga para a procura de persoas

A Xunta acaba de renovar o convenio anual que mantén coa asociación Cans de Salvamento de Galicia (Casaga) para a procura e rescate de persoas desaparecidas ou en perigo na zona norte das provincias da Coruña e Lugo, aínda que Casaga actúa tamén noutras zonas de Galicia e mesmo noutros países cando a súa colaboración é necesaria.

O director xeral de Emerxencias e Interior da Xunta, Santiago Villanueva, visitou este xoves as instalacións da entidade en Ferrol, no antigo cuartel Sánchez Aguilera.

Este lugar converteuse no centro das actividades que realiza esta asociación de voluntarios, encargada da atención, mantemento e adestramento dos cans de salvamento, así como da formación dos seus guías.

A través do convenio, a Dirección Xeral de Emerxencias e Interior, dependente da Vicepresidencia Primeira da Xunta, colabora no financiamento destas actuacións e das derivadas das intervencións dos seus equipos caninos na procura, localización e rescate de persoas desaparecidas ou en perigo.

Ademais de intervir nos dispositivos de rescate, Casaga colaborou no 2020 en distintos proxectos coa asociación SOS Desaparecidos e pasou a formar parte, como recurso externo, do Centro Nacional de Desaparecidos (CNDES), dependente do Ministerio de Interior.