Ampliado o tramo para a vacina de AstraZeneca de 55 a 65 anos e a grupos de actividade esencial
Sanidade explica que "cando haxa dispoñibilidade de dose desta vacina, poderase utilizar de forma paralela ás vacinas de ARNm para incrementar o ritmo de vacinación dos grupos etarios de maior idade".
Por E.P. | Madrid | 30/03/2021 | Actualizada ás 20:39
A Comisión de Saúde Pública aprobou a actualización cinco da Estratexia de Vacinación na que se inclúe a ampliación da idade de utilización da vacina de AstraZeneca no tramo de 55 a 65 anos, así como a actualización dalgúns dos grupos de risco a vacinar e as mensaxes fundamentais a transmitir á poboación. Segundo explican fontes da Consellería de Sanidade, Galicia abstívose neste encontro da Comisión de Saúde Pública.
Na actualización recóllense as características da vacina de Janssen. Sanidade explica que "cando haxa dispoñibilidade de dose desta vacina, poderase utilizar de forma paralela ás vacinas de ARNm para incrementar o ritmo de vacinación dos grupos etarios de maior idade". Respecto da vacina de AstraZeneca, tendo en conta a nova evidencia científica e a ficha técnica autorizada, amplíase o límite de idade".
Con ela, explica Sanidade, "completarase por tanto a vacinación dos grupos de poboación priorizados pola súa actividade esencial, como persoal sanitario e sociosanitario que non é de primeira liña e traballadores de institucións sanitarias e colectivos en activo cunha función esencial na sociedade como os das Forzas e Corpos de Seguridade do Estado ou docentes por exemplo (grupos 3 B e C e 6)". Ademais, continuarase vacinando a persoas de 56-65 anos (grupo 8), comezando polas de maior idade.
