Pontón reclama "investimentos e prazos concretos" na reunión entre Feijóo e Ábalos
"Queremos cifras, queremos datas e queremos ver as licitacións publicadas no BOE", di a líder nacionalista, que asegura que "o BNG non permitirá máis discriminacións nin agravios con Galicia".
Por E.P. | LUGO | 09/04/2021 | Actualizada ás 12:01
A portavoz nacional do BNG, Ana Pontón, reclama que a reunión entre o presidente da Xunta, Alberto Núñez Feijóo, e o ministro de Transportes, José Luís Ábalos, termine con "investimentos, prazos concretos e licitacións no BOE".
"Esperemos que esta vez a reunión acabe con compromisos, con investimentos e con prazos concretos en materia de infraestruturas que levan anos de atraso", sostén. "Queremos cifras, queremos datas e queremos ver as licitacións publicadas no BOE e non declaracións protocolarias, titulares e fume", agrega a líder do Bloque.
"Desde o BNG non imos permitir máis discriminacións nin agravios con Galicia, en cuestións como o AVE, a AP-9 ou o Porto Exterior da Coruña". Así se expresou este venres en Burela, onde participou nun encontro co sector pesqueiro da Mariña. A este respecto, avisa de que non ve de recibo que o Estado asuma a débeda do Porto de Valencia, de 300 millóns, "pero se negue a facer o mesmo co Porto da Coruña". "A resposta é que non hai ningunha razón, e que se hai vontade política daráselle a Galicia o mesmo trato", afirma.
Neste sentido, Pontón advirte de que estarán "moi atentas" ao resultado da reunión, pois deixa claro a PP e PSOE que o Bloque "non se vai quedar mudo se pretenden pactar unha nova discriminación neste país".
