Por Europa Press / Redacción | SANTIAGO DE COMPOSTELA | 13/04/2021 | Actualizada ás 18:35
Galicia rexistrou en 2020 un total de 1.538 incendios forestais (-7,7%) nos que arderon 14.837 hectáreas (+117%), segundo avanzou este martes no pleno do Parlamento o conselleiro de Medio Rural, José González. Desta superficie queimada, a maior parte, 12.872 hectáreas, foi monte raso, fronte a 1.964 arboredos.
O total de 14.837 hectáreas calcinadas en incendios forestais o ano da pandemia da covid é superior ao do conxunto dos anos 2018 e 2019 na comunidade galega, cando foron arrasadas 2.599 e 6.837 hectáreas, respectivamente. En calquera caso, supoñen cumprir o obxectivo que se marcou a consellería de que ardesen menos de 17.000 hectáreas.
Mentres, de acordo cos datos ofrecidos polo conselleiro este martes nunha comparecencia a petición propia, en 2021 foron contabilizados 255 lumes, deles 81 declarados en momentos nos que non poden traballar os medios de extinción, case o 32%, do que deduciu "unha clara intencionalidade".
Aínda en materia de loita contra o lume, González cifrou en 232 os concellos que xa contan con plan municipal contra incendios tramitado, o 86% dos consistorios adheridos ao convenio coa Xunta, e esperou que este ano se completen ata 269.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.