Prorrogada ata o 11 de maio a limitación de voos directos con Brasil e Suráfrica

O Goberno prorrogou ata o próximo 11 de maio a limitación dos voos directos entre Brasil e a República de Suráfrica e os aeroportos españois. A orde foi aprobada no Consello de Ministros deste martes e pola que o Executivo estableceu medidas excepcionais para limitar a propagación e o contaxio das cepas de Covid-19. A medida entrará en vigor desde as 00:00 do día 27 de abril ata as 00.00 horas do 11 de maio de 2021.

Segundo o previsto nos acordos, desde Brasil e Suráfrica só se poderán realizar voos a España que estean ocupados por cidadáns españois ou andorranos, así como residentes nestes países ou pasaxeiros en tránsito internacional a un país non Schengen con escala inferior a 24 horas sen abandonar a zona de tránsito do aeroporto español.

Con todo, estas restricións non afectan o persoal aeronáutico necesario para levar a cabo as actividades de transporte aéreo.

Ademais, contémplanse outras exencións relativas a voos de aeronaves de Estado, servizos de procura e salvamento (SAR), voos con escala en territorio español con fins non comerciais e que teñan por destino final outro país, voos exclusivos de carga, posicionais (ferri) e humanitarios, médicos ou de emerxencia.

A orde expresa a preocupación do Executivo pola extensión da variante brasileira, así como polos seus posibles efectos sobre a transmisibilidade da enfermidade e a capacidade de neutralización dos anticorpos. Ademais, a variante de Suráfrica preocupa pola súa alta prevalencia no país, motivada pola súa alta capacidade de trasmisión, o que "xustifica o mantemento da medida".