O plan de seguridade ferroviaria que esixira Europa a España quedou paralizado ante a chegada da pandemia

As autoridades españolas "tiveron que aprazar" polas consecuencias da pandemia sanitaria da covid "varias accións e actividades do plan de acción de seguridade ferroviaria" que lle esixiu Europa por mor dunha denuncia do BNG e despois das queixas expostas polas vítimas do accidente do tren Alvia ocorrido en Angrois en 2013.

Así llo comunica a comisaria de Transportes, Adina Valean, á portavoz do Bloque en Bruxelas, Ana Miranda, quen acusa o Goberno central de "escudarse" no coronavirus "para non cumprir a normativa europea de seguridade ferroviaria". "As escusas sucédense desde a apertura do procedemento de infracción en 2019: procesos electorais, Goberno en funcións e agora o coronavirus", censura.

Na súa resposta, datada o pasado 22 de abril, a Comisión informa a Miranda de que "mantén un estreito contacto coas autoridades españolas para abordar as preocupacións expostas na carta de emprazamento relacionadas coa correcta execución da Directiva*2004/49/CE1", que é a relativa á seguridade ferroviaria.

Engade que España "informan periodicamente sobre a situación do plan de acción" e precisa que o procedemento de infracción "non está relacionado coa obrigación de investigar os accidentes ferroviarios en España nin con ningún accidente concreto, senón que ten por obxecto garantir que o sistema ferroviario xeneral en España cumpre plenamente os requisitos da Unión".

"Debido á pandemia de covid-19, as autoridades españolas tiveron que aprazar varias accións e actividades do plan de acción de seguridade ferroviaria. A Comisión está a supervisar rigorosamente a situación para garantir o seu seguimento", resalta.

En calquera caso, afirma non poder dar ningún prazo para o seu cumprimento "xa que hai outras medidas da Comisión que dependen da execución satisfactoria do plan de acción de seguridade ferroviaria en España, o que permitirá estudar se as preocupacións expostas no procedemento de infracción están debidamente xustificadas e cumpren a lexislación da Unión".

"INADMISIBLE"

Para a portavoz nacionalista, "é inadmisible que ano tras ano e goberno tras goberno o Estado español non se tome en serio a seguridade dos viaxeiros". Este é, segundo critica, "un atraso máis sen xustificación que se suma ás demoras anteriores". Ademais de "a falta de dilixencia do Goberno español", a representante do BNG en Europa reprocha "falta de transparencia" á Comisión Europea, o que confronta coa "axilidade" da comisaria anterior, Violeta Bulc, que recibiu ás vítimas do sinistro ferroviario de Angrois en varias ocasións.

Así as cousas, dous anos despois da apertura do procedemento de infracción, advirte de que "xa non se está no momento de abordar preocupacións, senón de tomar decisións e executar as medidas que garantan a seguridade ferroviaria".

CONTENCIOSO DAS VÍTIMAS

Por outra banda, valora a admisión a trámite do contencioso-administrativo da plataforma de vítimas contra o Ministerio de Transportes pola súa negativa a revogar a parte dos integrantes da comisión de investigación de accidentes ferroviarios (CIAF).

"A falta de independencia da CIAF debe ser corrixida, xa que non o é agora nin tampouco o era na época de Ana Pastor", afirma Ana Miranda.

Ana Miranda (BNG). BNG | Fonte: Europa Press