A Xunta anuncia "transparencia" nos proxectos eólicos cunha rede de información provincial

A Xunta creará unha rede de información provincial para que os concellos poidan coñecer con anticipación os futuros proxectos eólicos. O vicepresidente económico da Xunta, Francisco Conde, avanzou este luns esta medida coa que o Goberno galego asegura que ofrece "a máxima transparencia e colaboración ás administracións locais".

Esta rede, explica o seu departamento, permitirá que, "antes de proceder á preceptiva exposición pública dos proxectos priorizados, póidase dar información de primeira man aos concellos en que se teña previsto implantar". O obxectivo é que as administracións locais coñezan as súas características "sen prexuízo das alegacións que este organismo, así como calquera outra persoa ou entidade da zona, poida presentar no trámite de exposición pública ordinario", apunta.

Será a través das xefaturas territoriais da Xunta onde se porá a disposición dos concellos toda a información dispoñible do proxecto xunto co estudo de impacto ambiental, indica a Vicepresidencia segunda.

SEIS PROXECTOS NA CORUÑA

No caso concreto da provincia da Coruña, a Xunta informa de seis proxectos en tramitación nos concellos de Lousame, Noia, Muros, As Somozas, Tordoia, Trazo e Val do Dubra. Son os parques de Cova da Vella, Cabazo, Gondre, Pedrabante, Tornado e Orzar, que suman 385,6 megawatts.

O novo texto normativo recolle que os proxectos eólicos serán considerados iniciativas empresariais prioritarias cando se encadren nun destes tres casos: se xustifican un compromiso industrial asociado ao parque que supoña a creación dun mínimo de 25 empregos, se teñen xustificada a totalidade dos compromisos industriais derivados da orde de marzo de 2010 e cando xeren un volume de investimento superior aos 20 millóns.