Unha persoa ferida nunha colisión dunha moto e un coche en Vilanova de Arousa
Trasladada unha persoa por un accidente múltiple entre tres coches en Teo.
Por E.P. | SANTIAGO DE COMPOSTELA | 19/05/2021 | Actualizada ás 10:05
Unha persoa foi trasladada despois de sufrir un accidente de tráfico entre un coche e unha moto na noite deste martes pasado no concello pontevedrés de Vilanova de Arousa.
Segundo informou o 112 Galicia, tivo coñecemento dos feitos sobre as 23,00 horas mediante a chamada dun particular que alertou dunha colisión entre unha moto e un turismo no lugar de Corón, na estrada comarcal PO-549 sobre o punto quilométrico 4.
Con esa información, o CIAE-112 informou os servizos sanitarios, á Garda Civil de Tráfico, aos Bombeiros de Vilagarcía de Arousa e aos membros de Protección Civil da localidade. Finalmente, os medios de intervención confirmaron que unha persoa ferida foi trasladada ao Hospital do Salnés. Ademais, o 112 Galicia tamén alertou aos medios de conservación da estrada coa finalidade de restablecer a seguridade da vía.
ACCIDENTE MÚLTIPLE
Por outra banda, un accidente entre tres coches no concello coruñés de Teo sucedido na noite deste martes saldouse cunha persoa ferida. Este sinistro ocorreu sobre as 21,30 horas deste martes e foi unha testemuña quen alertou ao 112 Galicia para solicitar asistencia para a estrada N-550, no punto quilométrico 69.
Por parte do Centro Integrado de Atención ás Emerxencias de Galicia informouse á Garda Civil de Tráfico e á Policía Local, a Urxencias Sanitarias, ao GES da Estrada, aos Bombeiros de Santiago e á Agrupación de Voluntarios de Protección Civil de Teo.
Finalmente, o 112 tivo constancia por parte de Urxencias Sanitarias de Galicia-061 de que unha persoa foi trasladada a un centro hospitalario.
