Por Europa Press / Redacción | Santiago de Compostela | 21/05/2021 | Actualizada ás 15:44
O 19% das mulleres asalariadas en Galicia tiñan soldos baixos en 2018, fronte ao 7,4% dos homes, segundo a enquisa de estrutura salarial que publica este venres o Instituto Galego de Estatística (IGE).
Esta enquisa considera asalariados con soldos baixos aqueles que gañan dous terzos ou menos da mediana das ganancias brutas por hora. Así, en Galicia, en 2018, o 13,1% dos asalariados tiñan salarios baixos, unha porcentaxe superior á de 2014, que era do 11,2%.
A distribución do salario anual en Galicia en 2018 mostra unha gran dispersión. O salario bruto anual do 50% dos asalariados galegos non supera os 18.600 euros (mediana).
Ese ano, só un 25% dos asalariados galegos percibiu un salario bruto anual superior a 26.946,82 euros e unicamente un 10% dos asalariados obtiveron un de máis de 37.884,89 euros.
O salario bruto anual medio en 2018 foi de 24.826,91 euros por traballador para homes, un 27,04% superior ao das mulleres, que se situou en 19.543,17 euros por traballador.
O 50% das mulleres non excede os 16.146,14 euros mentres que a porcentaxe de homes que gaña menos desa cantidade é en torno ao 25%.
En canto á fenda salarial, en Galicia foi do 8,5% en 2018. Deste xeito, situouse por baixo da fenda salarial da Unión Europea dos 28, que alcanzou o valor do 15%, e da de España, do 11,9%.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.