Galicia, lista para acoller 20 menores non acompañados trala crise en Ceuta

A ministra de Dereitos Sociais e Axenda 2030, Ione Belarra, celebrou o acordo alcanzado coas comunidades para a distribución de 200 menores migrantes non acompañados de Ceuta --20 para Galicia, cifra máis alta das autonomías xunto con Madrid--, tras a crise migratoria dos últimos días, e precisou que "a gran maioría das CCAA estiveron á altura", aínda que non quixo sinalar, por "discreción", ás que se opuxeron á repartición.

"Vanme permitir que sexa discreta co que se fala no Consello Territorial pero garántolle que a gran maioría de comunidades autónomas estiveron á altura", asegurou Belarra este martes en declaracións aos medios, tras a reunión do Consello Territorial de Servizos Sociais, na que Goberno e CCAA chegaron a un acordo para distribuír a 200 menores de Ceuta, que se desprazarán "no prazo máis curto de tempo".

Os menores que serán acollidos polas distintas CCAA son nenos, nenas e adolescentes que xa estaban en centros de protección de Ceuta e cuxa situación legal, escolar e sanitaria está atendida e regularizada pola Cidade Autónoma.

O obxectivo desta distribución é liberar os recursos de protección para estes menores en Ceuta para poder atender adecuadamente aos nenos e nenas recentemente chegados no medio da crise migratoria. En concreto, Belarra precisou que este acordo de repartición vailles permitir ter espazo suficiente para atender "dignamente" aos menores que chegaron ao longo da última semana a Ceuta e que manifestaron a súa vontade de quedar e emprender un proxecto migratorio.

INTEGRACIÓN

A conselleira de Política Social, Fabiola García, asegurou este martes que o Goberno galego traballa xa en como integrar os 20 menores non acompañados de Ceuta que chegarán a Galicia.

Preguntada sobre a data de chegada destes 20 menores non acompañados e os seus perfís, Fabiola García afirmou que por agora a Xunta de Galicia non conta con resposta a algunha a estas cuestións, pero asegurou que a rede asistencial galega conta coas prazas e a capacidade suficientes para "atender e integrar os menores da mellor forma posible".

Ademais, a conselleira mostrouse prudente ante a posibilidade de que os menores poidan entrar no sistema de acollida temporal, ou no sistema educativo galego a partir de setembro, e aprazou a toma deste tipo de decisións ata que "os equipos de menores avalíen de forma técnica cal é o mellor lugar para que estean".