Investigadores galegos constatan un aumento do consumo de drogas en períodos de incremento do desemprego
O estudo está sendo conducido desde a Universidade da Coruña.
Por Galicia Confidencial | Santiago de Compostela | 28/05/2021 | Actualizada ás 14:30
Un primeiro avance dun estudo realizado polos investigadores adscritos ao grupo de Macroeconomía e Saúde da Facultade de Economía e Empresa da Universidade da Coruña (UDC) Bruno Casal e Berta Rivera constatou un aumento do consumo de drogas en períodos de incremento do desemprego.
En concreto, os investigadores analizan o impacto da crise derivada da pandemia no consumo de drogas nos países do ámbito da Organización para a Cooperación e o Desenvolvemento Económicos (OCDE), segundo detallou a universidade. Así, búscase prever a evolución do consumo ligado á recesión asociada á crise actual para deseñar e poñer en marcha actuacións no ámbito da saúde co obxectivo de minimizar o seu impacto.
Deste xeito, os investigadores analizan se aumenta o consumo de substancias estupefacientes durante un período de recesión económica debido a aspectos asociados á tensión vinculada á situación e a cambios na utilidade do tempo ou se se reduce debido á diminución da renda dispoñible. O estudo contempla as drogas ilegais, a idade dos potenciais consumidores e o consumo asociado a cada tipo de substancia.
Un primeiro avance do traballo que se leva a cabo sinala que en períodos de crises increméntanse os patróns de consumo máis intensos e as sobredoses entre os maiores de 35 anos, o que pode relacionarse co consumo de opioides, en especial a inxección de heroína ou de varias drogas. Mentres, entre os menores de 35 anos obsérvase un aumento significativo do consumo de cannabis.
Por tanto, detéctase un aumento do consumo de cocaína e cannabis entre a franxa de maior idade e a poboación máis nova, respectivamente, durante as recesións. O maior incremento no consumo de drogas obsérvase entre os adolescentes e os adultos novos, na franxa comprendida entre os 15 e os 34 anos. Así mesmo, detectouse un maior impacto da recesión no consumo de drogas de consumidores habituais que no dos ocasionais.
Adicionalmente, os investigadores comprobaron que en períodos de dificultades económicas increméntanse as persoas dispostas a producir, traficar ou vender drogas ilícitas, o que aumenta nas posibilidades de acceso ás mesmas.
