Galicia arrinca a semana con 54 novos contaxios e un aumento da taxa de positividade
Os pacientes ingresados descenden lixeiramente a 83 e son 1.734 os casos activos de Covid.
Por Europa Press / Redacción | SANTIAGO DE COMPOSTELA | 07/06/2021 | Actualizada ás 11:04
Galicia arrinca a semana na que se cumprirá un mes sen estado de alarma con 54 novos contaios de Covid-19, a cifra máis baixa en meses, e con 1.734 casos activos, que encadean 16 xornadas consecutivas en descenso, mentres que os pacientes ingresados por este coronavirus descenden lixeiramente a 83, un menos.
Así se reflicte nos datos actualizados este luns pola Consellería de Sanidade, con rexistros ata as 18,00 horas deste domingo, recollidos por Europa Press, nos que indica que 15 pacientes permanecen en UCI debido á Covid en Galicia --sen cambios-- e 68 atópanse noutras unidades de hospitalización, un menos.
Por áreas sanitarias, a presión hospitalaria alíviase lixeiramente só na da Coruña e Cee, onde seguen dous pacientes en UCI e descenden a 12 os doutras unidades --un menos--. Pola súa banda, o resto de áreas sanitarias non experimentan cambios con respecto á xornada anterior. Deste xeito, na de Vigo seguen cinco pacientes Covid en UCI e sete noutras unidades de hospitalización; e na de Santiago e Barbanza mantéñense tres en críticos e 15 noutras unidades.
Tampouco hai cambios na de Ourense, que é a única que non ten pacientes Covid en UCI --desde o venres-- e mantén sete noutras unidades, mentres que na de Lugo continúan dous ingresados en críticos e seis noutras unidades. Na de Pontevedra e O Salnés seguen dous pacientes Covid en UCI e 13 noutras unidades; e a de Ferrol mantense cun en críticos e oito noutras unidades.
MENOS CASOS ACTIVOS
En canto aos casos activos de Covid proseguen con tendencia descendente por décimo sexta xornada consecutiva e sitúanse en 1.734, como na segunda quincena de agosto do pasado ano, o que supón 117 menos que a xornada anterior, ao haber máis altas (171) que contaxios (54).
Por áreas sanitarias, as infeccións activas descenden en todas: Vigo (-40), Santiago e Barbanza (-29); Pontevedra e O Salnés (-19), Lugo (-16), A Coruña e Cee (-9) e Ferrol (-7) ; salvo na de Ourense (+3), na que aumentan lixeiramente.
Por tanto, á cabeza en casos activos mantense a de Vigo, con 448; seguida da da Coruña e Cee, con 324; Santiago e Barbanza, con 295; Lugo, con 224; Pontevedra e O Salnés, con 193; Ourense, con 161; e á cola segue Ferrol, con 89.
CAEN OS NOVOS CONTAXIOS
En canto aos novos contaxios de Covid-19 detectados con calquera tipo de proba redúcense a 58, que supoñen 16 menos que a xornada anterior, a cifra máis baixa rexistrada en meses en Galicia, tras situarse, salvo un par de xornadas, toda a semana pasada por baixo do centenar.
No conxunto de Galicia foron confirmados 58 positivos por Probas Diagnósticas de Infección Activa (PDIA) nas últimas 24 horas, segundo os datos actualizados por Sanidade, deles 17 na área da Coruña e Cee; 11 na de Ourense; oito na de Pontevedra e O Salnés; sete na de Vigo; outros sete na de Lugo; seis na de Santiago e Barbanza; e dous na de Ferrol.
En canto á taxa de positividade, aumentou lixeiramente por encima do dous por cento a un 2,16%, e tras situarse nun 1,6% a xornada anterior. Así, segue por baixo do 5% que a Organización Mundial da Saúde (OMS) fixa para dar por controlada esta pandemia. A última vez que Galicia excedeu esta barreira foi o 15 de febreiro.
