Guerra entre os "pulpeiros" en Pontevedra
Un hostaleiro sancionado por vender polbo ilegalmente denunciou a outros tres "pulpeiros". O PP pedirá explicacións á edil de Seguridade Cidadá e acusa o Concello de realizar unha "caza de bruxas" contra a hostalaría.
Por Europa Press / Redacción | SANTIAGO DE COMPOSTELA | 08/06/2021 | Actualizada ás 20:30
A Policía Local de Pontevedra presentou tres denuncias a "pulpeiros" que cociñaban e servían racións no espazo público de acordo con locais de hostalaría por mor da queixa dun particular pola presenza dun vendedor na rúa Cruz Gallástegui.
Estas actuacións deriváronse da actitude do propietario do primeiro local apercibido que, tras enfrontarse verbalmente aos axentes, delatou a outros dous "pulpeiros" que traballaban noutros puntos da cidade.
Os feitos, que se produciron na mañá do pasado sábado, poderían carrexar a imposición dunha sanción por infracción, xa que a actividade dos "pulpeiros" considérase como venda ambulante e, sen a preceptiva licenza municipal, trátase dunha actividade ilegal. Será o Servizo de Disciplina Urbanística do Concello, destinatario dos informes dos axentes municipais, o que determine as consecuencias.
O portavoz da Policía Local de Pontevedra, Manuel Omil, sinalou que o local de hostalaría da rúa Cruz Gallástegui que motivou a queixa veciñal e propiciou as demais denuncias, xa fora apercibido noutras ocasións por este motivo.
REACCIÓN DO PP LOCAL
Por mor desta situación, o presidente local do PP no Concello de Pontevedra, Rafael Domínguez, solicitou unha copia da denuncia realizada polo particular e que tivo como consecuencia "castigar ao resto de pulpeiros que estaban a levar a cabo o seu labor con todos os papeis en regra", aseguraron desde o Grupo Municipal do PP.
Con estas medidas, Domínguez criticou que os locais de hostalaría fosen "atacados" por tentar "engadir valor ao seu negocio" concertando a presenza dos "pulpeiros". Por iso, o portavoz municipal do PP dirixirase no próximo pleno á concelleira de Seguridade Cidadá, Eva Villaverde, para pedir explicacións polo "acoso e derriba continuada cara á hostalaría" por parte do Concello.
