Sanidade prevé que co inicio de curso "unha parte importante" de adolescentes estean vacinados
Tamén se aprobou continuar coa estratexia de vacinación nos menores de 40 anos
Por Europa Press / Redacción | SANTIAGO DE COMPOSTELA | 16/06/2021 | Actualizada ás 18:58
O conselleiro de Sanidade, Julio García Comesaña, manifestou que a "intención" é que o grupo de adolescentes, entre 12 e 16 anos, vaia a continuación dos maiores de 18 anos, de maneira que, co ritmo actual de vacinación, "unha parte importante" estea no proceso ao comezo do curso.
A extensión da vacinación aos adolescentes recibiu agora luz verde, á vez que tamén se aprobou continuar coa estratexia de vacinación nos menores de 40 anos, que Galicia espera empezar a vacinar a principios de xullo. Ademais, ese mes chegará a posibilidade de pedir cita previa para vacinarse nos ocos que queden dispoñibles, un sistema "mixto" que permitirá adaptar situacións persoais e laborais na época estival.
"Coa previsión de vacinas que temos, ao comezo de curso unha parte importante deles poderían estar en fase de vacinación. Calquera melloría da estimación de vacinas, podería melloralo", sinalou Comesaña, a preguntas dos medios, na rolda de prensa do comité clínico.
En todo caso, falta por facer os axustes da poboación diana que se suma á estratexia de vacinación, posto que hai persoas deste colectivo que se van a priorizar por ter algunha patoloxía específica ou condición que así o determine a estratexia para o resto de grupos.
De acordo con iso, tamén os estudantes que se van de Erasmus o próximo curso, poderán así mesmo adaptar a súa vacinación ao comezo da súa estancia.
