Comezou a destrución do sitio arqueolóxico de Coeses
A súa escavación descubriu un lugar único, polas súas características en Galicia, da Idade do Bronce ou primeira Idade do Ferro. As obras da Autovía Lugo-Santiago arrasan con boa parte do sitio.
- Un xacemento único en Galicia condenado á desaparición
- Xacementos únicos "abandonados" por Xunta e Fomento
Por Galicia Confidencial | Lugo | 26/11/2013 | Actualizada ás 09:35
O inicio das obras de construcción da A-54, a autovía Lugo-Santiago, enterrarán para sempre un sitio arqueolóxico único en Galicia; o de Coeses, en Lugo. E iso, a pesares de que existe unha denuncia no xulgado para defender o lugar. Pero, como non se tomaron medidas cautelares ao respecto, non se puideron paralizar as obras.
"Nin sequera se respectou aquela proposta de Fomento de desviar a estrada 20 metros. Dende o comezo do túmulo non hai máis de 5 metros, as foxas de inhumación desapareceron, e sobre o xacemento semella que pasou unha apisonadora", sinala a GC o divulgador Xavier Moure, que coñece ben este xacemento.
Precisamente, a medida que as escavacións foron avanzando, foise descubrindo que o xacemento era único, polas súas características, en Galicia. Podería corresponder a un posible túmulo duns 60 metros de diámetro, probablemente datado na Idade do Bronce ou a primeira Idade do Ferro, con muros interiores e exteriores, e arrodeado por un foxo. Ademais, existen foxos tamén no interior da area tumular onde se atoparon restos cerámicos. Este tipo de estruturas anexas ó túmulo son algo do que non se tiñan noticias no rexistro arqueolóxico galego.
Máis perigos
Tras o inicio das obras da autovía, aínda quedan por facer os muros de contención e os valados, o que empeorará, aínda máis, a situación do xacemento. Outro atranco é que, ao non respectarse unha área de cautela, os profesionais temen que se teña perdida moitísima información, "xa que a totalidade desta non ten porque estar forzosamente dentro do túmulo", indica Moure. "Tamén ignoramos que fixo Patrimonio, se deu o visto e prace para continuar coas obras ou nin sequera foi informado", engade.
Cando se coñeceu esta problemática, o arqueólogo da Dirección Xeral de Patrimonio en Lugo, Gonzalo Meijide, recoñeceu unha "posibel función ritual" do achado. En declaracións a Culturagalega.org comparouno, a modo hipotético, co sitio arqueolóxico da Roda de Barreiros, outro círculo escavado na súa totalidade neste concello da Mariña lucense, que a penas ofreceu material que permitira a súa datación segura. En todo caso, a Xunta tamén recoñece a importancia do xacemento. "Aínda que pode haber algúns paralelos, o lugar é moi novidoso no contexto galego e peninsular", sinalaba.
