Vox refírese ao presidente da Xunta como "Castelao-Feijóo" pola postura do PP sobre a transferencia de tráfico

Ortega Smith considera que se trata dunha postura "covarde" e "cínica".

Por Europa Press / Redacción | SANTIAGO DE COMPOSTELA | 17/06/2021 | Actualizada ás 21:46

Comparte esta noticia

O secretario xeral de Vox, Javier Ortega Smith, cargou contra o presidente galego e líder do PPdeG, Alberto Núñez Feijóo, ao que se referiu durante un acto político como "Castelao-Feijóo", pola postura "covarde" e "cínica" do Partido Popular sobre a Lei para a transferencia das competencias de tráfico a Galicia.

O tamén deputado e concelleiro en Madrid participou na tarde deste xoves nunha manifestación celebrada baixo un amplo despregamento policial nas rúas de Santiago e que se produciu días despois de coñecerse o cambio de postura dos populares sobre unha lei cuxa admisión a trámite facilitaron no Parlamento autonómico coa súa abstención pero que agora tombarán grazas á súa maioría absoluta no Pazo do Hórreo.

O acceso á sede do Lexislativo galego foi o lugar desde o que partiu a marcha, na que participaron decenas de simpatizantes de Vox chegados de distintos puntos de Galicia en autobuses fretados pola organización.

A manifestación produciuse baixo un importante despligue de efectivos da Policía Nacional, que retiveron a un grupo de persoas que participaban nunha contramanifestación en protesta pola presenza da formación que lidera Santiago Abascal na capital galega. Ademais, tres persoas que irromperon na manifestación a berro de "Vox escoria" o seu paso pola Rúa do Hórreo foron reducidas polos axentes.

O secretario xeral de Vox, Javier Ortega Smith, participa nunha manifestación en protesta contra a lei de transferencia das competencias de tráfico a Galicia. ARXINA / EUROPA PRESS / Europa Press
O secretario xeral de Vox, Javier Ortega Smith, participa nunha manifestación en protesta contra a lei de transferencia das competencias de tráfico a Galicia. ARXINA / EUROPA PRESS / Europa Press


A marcha concluíu pasadas as 20,00 horas do xoves na Alameda compostelá, onde tomou a palabra Ortega Smith para cargar contra o PP e o seu líder en Galicia, ao que definiu como "o alumno avantaxado do separatismo" a quen "(Jordi) Pujol tería nas primeiras filas das súas clases de separatismo e odio".

Tras referirse en varias ocasións ao presidente autonómico como "Castelao-Feijóo", o parlamentario de Vox tachou ao PP de partido "camaleónico", que "se transforma" segundo o territorio "para comprar votos".

En Galicia, segundo Ortega Smith, os populares "compran o relato do nacionalismo", "compran os medios de comunicación", "impoñen" a lingua galega e "crean unha ficción histórica".

"Agora moléstalle a Benemérita", aseverou o deputado, en referencia ao citado proxecto de lei que, en caso de desenvolverse, implicaría a posta en marcha da Policía Autonómica, cuxa creación está recollida no Estatuto de Autonomía de Galicia e que se encargaría de xestionar as competencias de tráfico, función que na actualidade desempeña a Garda Civil.

Para Ortega, o PP actuou de forma "indigna" e "covarde" porque "primeiro non se atreveron a votar a favor" e abstivéronse "para que saíse adiante" e "cando Vox saíu a denuncialo" cambiaron a súa postura.

"A Feijóo que lle quede moi claro. Galicia seguirá sendo parte de España e a Garda Civil seguirá patrullando en Galicia", exclamou antes de vaticinar que Vox "botará" ao PP da Xunta "como botou" ao PSOE do Goberno de Andalucía.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta